काठमाडौं । नेपाली कांग्रेसले पार्टीको महाधिवेशनमा आर्थिक चलखेल भएको भन्ने चर्चा पूर्ण रूपमा निराधार भएको बताएको छ। वरिष्ठ उपसभापति विश्वप्रकाश शर्माले यस्ता कुरा सरकारकै तर्फबाट प्रायोजित रूपमा फैलाइएको आरोप लगाएका छन्।
बुधबार पार्टी केन्द्रीय कार्यालय सानेपामा आयोजित आकस्मिक पत्रकार सम्मेलनमा शर्माले विशेष महाधिवेशन विधिसम्मत रूपमा सम्पन्न भएको र निर्वाचन आयोगले त्यसलाई संविधानअनुसार अद्यावधिक गरिसकेको बताए। त्यसपछि पनि नियोजित रूपमा भ्रम फैलाउन खोजिएको उनको भनाइ थियो।
विशेष महाधिवेशन विधिअनुसार भएको र निर्वाचन आयोगले संविधानबमोजिम त्यसलाई अद्यावधिक गरेको उनले बताए। तर अहिले आर्थिक चलखेलको विषय ल्याइएको छ, जुन सरकारको तर्फबाट प्रायोजित ढङ्गले ल्याइएको उनको दाबी छ। त्यसमा कुनै सत्यता नरहेको उनले स्पष्ट पारे।
शर्माले कांग्रेसको १५औँ महाधिवेशन सात हजारभन्दा बढी प्रतिनिधिको सहभागितामा भव्य रूपमा सम्पन्न भएको बताए। महाधिवेशनबाट निर्वाचित कार्यसमिति विधि र प्रक्रियाअनुसार नै अगाडि बढिरहेको उनले स्पष्ट पारे।
सम्मेलनमा उनले सञ्चारगृहमाथि भइरहेको दबाबप्रति पनि आपत्ति जनाए। मिडिया हाउसको गेटमा गाडी तेर्स्याएर अवरोध गरिएको घटनाबारे सत्तारूढ राष्ट्रिय स्वतन्त्र पार्टीले छानबिनको निर्देशन दिएको प्रसङ्ग उठाउँदै उनले सरकारको कदममाथि प्रश्न उठाए। सरकारले मिडियामाथि अनुचित दबाब बढाएको र विपक्षीलाई बदनाम गर्न तथ्यहीन आरोप फैलाइरहेको भन्दै उनले यस्ता गतिविधि तत्काल रोक्न चेतावनी दिए।
