काठमाडौं । नेपाली कांग्रेसको १५औँ महाधिवेशनमा सभापति पदमा विजयी भएका गगनकुमार थापाले सबै निर्वाचित उम्मेदवारमध्ये सबैभन्दा धेरै मत पाएका छन्। महाधिवेशनको मतदानमा थापाले ६ हजार ५८४ मत अर्थात् कुल मतको ९४.६ प्रतिशत मत पाएका हुन्। उनका प्रतिस्पर्धी श्यामकृष्ण खड्कालाई उनले हराएका थिए, जसले ३७५ मत अर्थात् ५.४ प्रतिशत मत पाए।
मतपरिणामअनुसार शीर्ष १० मत पाउने सूचीमा सभापति थापापछि खुला केन्द्रीय सदस्यमा निर्वाचित चिरीबाबु महर्जन दोस्रो स्थानमा छन्। ललितपुर महानगरपालिकाका मेयरसमेत रहेका महर्जनले ५ हजार ३३० मत अर्थात् ७७.५ प्रतिशत मत पाए। तेस्रो स्थानमा वासना थापा छन्, जसले ५ हजार १९३ मत अर्थात् ७४ प्रतिशत मत पाइन्।
बागमतीबाट महिला केन्द्रीय सदस्यमा निर्वाचित हरिप्रभा खड्गी ५ हजार १२६ मतसहित चौथो, महिला सहमहामन्त्री प्रतिमा गौतम ५ हजार ११६ मतसहित पाँचौँ स्थानमा रहिन्। खुला केन्द्रीय सदस्य निश्कल राई ४ हजार ९५६ मतसहित छैटौँ, दलित सहमहामन्त्री प्रकाश रसाइली ‘स्नेही’ ४ हजार ८०३ मतसहित सातौँ, जनजाति केन्द्रीय सदस्य तीर्थ लामा ४ हजार ८५३ मतसहित आठौँ स्थानमा रहे। खुला केन्द्रीय सदस्य इन्द्रबहादुर बानियाँ ४ हजार ७३२ मतसहित नवौँ र गण्डकीबाट ३५ वर्षमुनि युवामध्ये केन्द्रीय सदस्यमा निर्वाचित इन्जिनियर सुवास पौडेल ४ हजार ५४९ मतसहित दसौँ स्थानमा रहेका छन्।
