नेपाली कांग्रेसको पन्ध्रौँ महाधिवेशनमा निर्वाचित केन्द्रीय सदस्य हेमकाजी बस्नेतको शैक्षिक प्रमाणपत्रबारे छानबिन गर्न माग गर्दै उजुरी दर्ता भएको छ। कोशी प्रदेशबाट ३५ वर्षमुनिको खुला समूहमा केन्द्रीय सदस्यमा निर्वाचित भएका इन्जिनियर बस्नेतको योग्यतासम्बन्धी कागजातमा गम्भीर प्रश्न उठेको भन्दै पराजित एक उम्मेदवारले केन्द्रीय निर्वाचन समितिमा उजुरी दिएका हुन्।
उजुरीकर्ता अनुसार बिहीबार बिहान इमेलमार्फत पठाइएको उजुरीमा नेपाल इन्जिनियरिङ परिषद्मा दर्तासम्बन्धी विवरण र विषयसँग जोडिएका अन्य प्रमाण संलग्न गरिएको छ। उजुरीकर्ताले आफ्नो नाम सार्वजनिक गरेका छैनन्। उनले यो विषयलाई व्यक्तिगत आग्रह वा राजनीतिक प्रतिशोधका रूपमा नभई पार्टीको प्रतिष्ठा र संस्थागत मर्यादासँग जोडिएको गम्भीर सरोकारका रूपमा हेर्न समितिसँग आग्रह गरेका छन्।
उजुरीमा सम्बन्धित विश्वविद्यालय र नेपाल इन्जिनियरिङ परिषद्सँग प्रमाणपत्रको आधिकारिकता र वैधताबारे जानकारी लिएर सत्यतथ्य पुष्टि गर्न माग गरिएको छ। छानबिनबाट अनियमितता वा नियमविपरीत काम भएको देखिए पार्टीको विधान र प्रचलित कानुनअनुसार प्रक्रिया अघि बढाउन पनि उजुरीमा भनिएको छ।
यसअघि सोही महाधिवेशनमा ३५ वर्षमुनिको केन्द्रीय सदस्यमा निर्वाचित सुशील भट्टविरुद्ध पनि उजुरी परेको थियो। त्यस उजुरीमा युवा महाधिवेशन प्रतिनिधि क्लस्टरबाट उम्मेदवारी दिएका र निर्वाचित भएका सबै उम्मेदवारको उमेरसम्बन्धी विवरण नागरिकता र अन्य प्रामाणिक कागजातका आधारमा छानबिन गर्न माग गरिएको थियो।
