काठमाडौं उपत्यकामा सवारी चालक अनुमतिपत्र लिन चाहने सेवाग्राहीले ट्रायल सेन्टरको संख्या कम भएकाले कठिनाइ भोग्दै आएका छन्। त्यसमा पनि केही सेन्टरले प्रदेश सरकारले निर्धारण गरेको सीमाभन्दा बढी रकम लिइरहेको गुनासो बढेको छ।
नुवाकोटका दिवस थापाले दुई पांग्रे सवारीको ट्रायल दिन एकान्तकुना जाँदा मूल्य अभिवृद्धि करसहित ३६४ रुपैयाँ तिर्नुपरेको बताए। धादिङका प्रवास दुवाडीले बुधबार चार पांग्रे सवारीको ट्रायलका लागि ६५५ रुपैयाँ तिरेको बिल आफूसँग सुरक्षित रहेको बताए। अन्य सेवाग्राहीले पनि यस्तै गुनासो गरेका छन्।
बागमती प्रदेश सरकारले २०७८ सालमा ल्याएको कार्यविधिमा मोटरसाइकल, स्कुटर र मोपेडको ट्रायलका लागि अधिकतम २३८ रुपैयाँ ६२ पैसा तोकिएको छ। कार, जिप र डेलिभरी भ्यानका लागि ४०९ रुपैयाँ ६० पैसा, टेम्पो र अटोरिक्साका लागि ४०१ रुपैयाँ ५० पैसा, मिनी बस, मिनी ट्रक, बस, ट्रक र लहरीका लागि ५६२ रुपैयाँ र ट्र्याक्टरका लागि ५५० रुपैयाँ अधिकतम शुल्क निर्धारण गरिएको छ।
यसको पछाडि पुरानो सम्झौता र कानुनी अन्योल रहेको बताइएको छ। यातायात व्यवस्था कार्यालय संघ सरकारअन्तर्गत हुँदा २०७३ सालमा कार्यालय र सुजुकी ड्राइभिङ स्कुल प्रालिबीच एकान्तकुनामा ट्रायल सञ्चालन गर्ने सम्झौता भएको थियो। जानकारहरूका अनुसार कार्यविधि आउनुअघि निजी सेन्टरसँग १० वर्षसम्मका सम्झौता भएका थिए र हरेक दुई वर्षमा १० प्रतिशतका दरले शुल्क बढाउन पाउने व्यवस्था थियो। पछि बनेको कार्यविधिले पुरानो सम्झौतालाई समेट्न नसकेकाले सेन्टरहरूले त्यसको फाइदा उठाएको बताइएको छ।
बागमती प्रदेशको उद्योग, पर्यटन, श्रम तथा यातायात मन्त्रालयका सूचना अधिकारी भरत शर्माले हालसम्म मन्त्रालयमा कुनै औपचारिक उजुरी नआएको बताए। कार्यविधिविपरीत थप रकम लिएको पाइएमा र सेवाग्राहीले प्रमाणसहित उजुरी दिएमा तत्काल कानुनी कारबाही अघि बढाइने उनले बताए। अनुगमन कडा पारिने र बालाजुमा नयाँ सेन्टर एक साताभित्र खोल्ने तयारी भएको उनले जानकारी दिए।
