साओ पाउलो — ब्राजिलको चर्चित फुटबल क्लब कोरिन्थियन्सको आधिकारिक वेबसाइटमाथि साइबर आक्रमण भएको छ। शनिबार बिहान भएको आक्रमणमा ह्याकरहरूले वेबसाइट नियन्त्रणमा लिएर अर्जेन्टिनी स्टार लियोनेल मेस्सीलाई सन् २०२७ का लागि क्लबमा अनुबन्ध गरिएको झुटो घोषणा प्रकाशित गरेका हुन्।
ह्याकरहरूले वेबसाइटमा लामो वक्तव्य राख्दै हाल अमेरिकी क्लब इन्टर मियामीबाट खेलिरहेका मेस्सी कोरिन्थियन्समा आबद्ध भएको दाबी गरेका थिए। उनीहरूले मेस्सीलाई क्लबको मुख्य खेलाडीका रूपमा भित्र्याउन सफल भएको भन्दै कथित सम्झौताका वित्तीय विवरणसमेत सार्वजनिक गरे। वेबसाइटमा मेस्सीको नाममा एउटा भनाइसमेत राखिएको थियो, जसमा उनले ब्राजिलियन फुटबलमा खेल्ने अवसर पाउँदा खुसी लागेको बताएका थिए।
यो झुटो घोषणाले क्लबका केही समर्थकलाई आश्चर्यमा पारेको थियो। तर वेबसाइटमा अनधिकृत प्रवेश भएको थाहा पाएपछि क्लबले उक्त सामग्री हटाएको थियो। त्यसपछि वेबसाइटमा प्राविधिक सुधार भइरहेको सूचना राखिएको थियो।
कोरिन्थियन्सले आफ्नो आधिकारिक वेबसाइटमा साइबर आक्रमण भएको पुष्टि गरेको छ। क्लबका अनुसार सूचना प्रविधि टोलीले छिट्टै आक्रमण नियन्त्रणमा लिन सफल भएको थियो। क्लबले जारी गरेको वक्तव्यमा आर्थिक क्षति भएको वा संस्थासँग सम्बन्धित तथ्यांक तथा सूचनामा अनधिकृत पहुँच पुगेको प्रमाण नभेटिएको जनाएको छ। सुरक्षात्मक उपायस्वरूप क्लबले आफ्ना डिजिटल प्लेटफर्महरूको सुरक्षा प्रणाली थप मजबुत बनाउने निर्णय गरेको छ। प्राविधिक परीक्षण पूरा गर्न क्लबको आधिकारिक वेबसाइट र उसको घरेलु मैदान निओ क्विमिका एरेनाको वेबसाइटसमेत अस्थायी रूपमा बन्द गरिएको थियो।
कोरिन्थियन्सको वेबसाइटमाथिको आक्रमण ब्राजिलकै अर्को चर्चित क्लब पाल्मेइरासको वेबसाइट ह्याक भएको केही दिनपछि भएको हो। त्यसबेला ह्याकरहरूले पाल्मेइरासको वेबसाइटमा क्लबले अहिलेसम्म विश्व उपाधि जित्न नसकेको भन्दै व्यङ्ग्यात्मक सन्देश राखेका थिए। ब्राजिलका दुई लोकप्रिय फुटबल क्लबका आधिकारिक वेबसाइटमा लगातार भएका साइबर आक्रमणले खेलकुद संस्थाहरूको डिजिटल सुरक्षामाथि प्रश्न उठाएको छ।
