सप्तरी र सुनसरीलाई जोड्ने कोशी ब्यारेज पुलको विकल्पका रूपमा नयाँ पुल निर्माण हुने भएको छ। सप्तरीको कञ्चनपुरदेखि सुनसरीको राजाबाससम्म तीन किलोमिटर लामो पुल बनाउने योजना अघि बढेको हो।
केही वर्षअघि तयार पारिएको विस्तृत परियोजना प्रतिवेदनका आधारमा यो पुल निर्माण गर्न लागिएको सडक विभागको आयोजना निर्देशनालयका निर्देशक चुडाराज ढकालले जानकारी दिए। उनका अनुसार पुल निर्माणको अनुमानित लागत ४३ अर्ब रुपैयाँ छ।
एसियाली विकास बैंकको सहयोगमा बन्ने यो पुल सञ्चालनमा आएपछि पूर्व–पश्चिम राजमार्गको यात्रा १४ किलोमिटरले छोटिनेछ। परियोजनाअन्तर्गत विशिष्ट प्रकृतिको पुलसँगै ४३ किलोमिटर नयाँ सडक पनि निर्माण गरिनेछ। अहिले पुल तथा सडक निर्माणसम्बन्धी आवश्यक प्राविधिक तयारी भइरहेको ढकालले बताए।
पुल र सडकको समग्र संरचना निर्माणका लागि प्रक्रियागत काम अघि बढिरहेको छ। परियोजना क्षेत्र कोशीटप्पु वन्यजन्तु आरक्षसँग जोडिएकाले वातावरणीय तथा कानुनी स्वीकृतिका केही विषयमा काम भइरहेको छ।
कोशी ब्यारेज पुरानो हुँदै गएको र सवारी चाप बढ्दै गएकाले प्रस्तावित वैकल्पिक मार्गले नेपालको पूर्वी क्षेत्रमा यातायात सञ्चालन र व्यवस्थापनमा महत्वपूर्ण भूमिका खेल्ने अपेक्षा गरिएको छ।
