काठमाडौं । नेपाली कांग्रेसभित्रको देउवा समूहले आफ्नो भ्रातृ संगठन नेपाल लोकतान्त्रिक खेलकुद संघको नयाँ अध्यक्षमा चितवनका सुवोध प्रधानलाई चयन गरेको छ ।
देउवा समूहको १५औं नियमित महाधिवेशन तयारी समितिका संयोजक डा. शशांक कोइरालाले प्रधानलाई अध्यक्षको जिम्मेवारी सुम्पिएका हुन् । संयोजक कोइरालाको सचिवालयका अनुसार प्रधानले आगामी छ महिनाभित्र संघको अधिवेशन सम्पन्न गर्नुपर्नेछ ।
कराते तथा किक बक्सिङ खेलमा लामो समयदेखि क्रियाशील प्रधान खेलकुद क्षेत्रको विकास र संगठन विस्तारमा पनि सक्रिय रहँदै आएका छन् । उनी यसअघि संघको महासचिवको भूमिकामा काम गरिसकेका छन् भने देउवा समूहबाट कांग्रेसको महासमिति सदस्य समेत रहेका छन् ।
देउवा समूहले यसअघि नै नेपाल विद्यार्थी संघ, नेपाल तरुण दल र नेपाल दलित संघमा पनि समानान्तर अध्यक्ष तोकेको थियो । खेलकुद संघमा प्रधानको मनोनयनसँगै समूहले आफ्ना भ्रातृ संगठनहरूमा नेतृत्व चयनको कामलाई निरन्तरता दिएको देखिएको छ ।
