काठमाडौं । नेपाली कांग्रेसको १५औँ महाधिवेशनबाट गगन थापाको नेतृत्वमा २३१ सदस्यीय नयाँ कार्यसमिति चयन भएको छ । असोज १८ देखि २३ गतेसम्म काठमाडौंमा भएको महाधिवेशनले आगामी चार वर्षका लागि यो कार्यसमिति चुनेको हो ।कांग्रेसको विधानमा २९७ सदस्यीय केन्द्रीय समितिको व्यवस्था छ । तर ६६ जना सदस्य सभापतिले मनोनयन गर्ने प्रावधानका कारण महाधिवेशनबाट २३१ जना छानिएका हुन् ।गत असोज २३ गते भएको निर्वाचनको मतगणना शुक्रबार बिहान सम्पन्न भएको हो । निर्वाचन समितिका अनुसार सभापतिको शपथ शनिबार दिउँसो २ बजे हुनेछ भने बाँकी पदाधिकारी तथा सदस्यहरूको प्रमाणपत्र वितरण र शपथ दशैंपछि गरिनेछ ।सभापतिमा श्यामकृष्ण खड्कीलाई पराजित गर्दै गगन थापा निर्वाचित भए । सदर भएको ६ हजार ९ सय ५९ मतमध्ये थापाले ६ हजार ५ सय ८४ मत पाए । यो सदर मतको ९४ दशमलव ६ प्रतिशत हो ।वरिष्ठ उपसभापतिमा विश्वप्रकाश शर्मा, महिला उपसभापतिमा पुष्पा भुसाल र काठमाडौं उपत्यका महिलामा प्रा.डा. अमिता प्रधान शाक्य निर्विरोध निर्वाचित भएका छन् । खुला उपसभापतिमा डा. चन्द्रकान्त भण्डारी र ई. मधु आचार्य तथा समावेशी उपसभापतिमा विनोद चौधरी चुनिए । खुला महामन्त्रीमा प्रदीप पौडेल र उदय शमशेर जबरा तथा महिला महामन्त्रीमा डा. डिला संग्रौला पन्त निर्वाचित भएका छन् । विभिन्न १० क्लस्टरबाट ११ जना सहमहामन्त्री चुनिएका छन् ।