पोखरा — गृहमन्त्री सुधन गुरुङसँग जोडिएको भ्रामक भिडियो सामाजिक सञ्जालमा फैलाएको आरोपमा नेपाल कम्युनिस्ट पार्टी (नेकपा) कास्कीका नेता गोविन्द अधिकारी पक्राउ परेका छन्।
प्रहरीका अनुसार गोरखामा आयोजित कार्यक्रमलाई लिएर तयार पारिएको गलत सामग्री सामाजिक सञ्जालमा राखेको भन्दै उनीमाथि जिल्ला प्रहरी कार्यालय गोरखामा विद्युतीय कारोबार ऐनअन्तर्गत मुद्दा दर्ता भएको थियो। त्यसपछि उनको स्थान कास्कीमा देखिएपछि त्यहीँबाट नियन्त्रणमा लिइ थप अनुसन्धानका लागि गोरखा पठाइएको हो।
कास्की प्रहरीका इन्स्पेक्टर दीपक रिजालले प्रक्रिया पूरा गरेरै पक्राउ गरिएको बताए। गृहमन्त्रीको निर्देशनमा पक्राउ गरिएको नेकपाको आरोप छ।
अधिकारीले आम नागरिकलाई भ्रममा पार्ने खालका सूचना र भिडियो फैलाएको आरोप प्रहरीको छ। उनीमाथि विद्युतीय कारोबार ऐनअन्तर्गत अनुसन्धान अघि बढाइएको छ।
यता, वाईसीएल नेपाल कास्की जिल्ला समन्वय समितिले अधिकारीको निशर्त रिहाइको माग गरेको छ। समितिले सरकारसमक्ष पाँच बुँदे माग राख्दै राजनीतिक आस्था र सरकारको आलोचनाका आधारमा हुने धरपकड तथा राजनीतिक प्रतिशोध तत्काल रोक्न आग्रह गरेको छ। लोकतान्त्रिक व्यवस्थामा सरकारका गलत निर्णय र राज्यशक्तिको दुरुपयोगविरुद्ध आवाज उठाउनु नागरिकको मौलिक अधिकार भएकाले अभिव्यक्ति स्वतन्त्रतामा अंकुश नलगाउन समितिको भनाइ छ। राज्यसत्ताको दमनले नागरिकको आवाज नदबिने र प्रतिरोध अझ सशक्त बन्ने चेतावनी पनि समितिले दिएको छ।
