चितवन — जिल्लाका केही विद्यालयका व्यवस्थापन समितिले पठनपाठनको गुणस्तर उकास्नुभन्दा भवन निर्माण र शिक्षक–कर्मचारीको नियुक्ति, सरुवा तथा बढुवाजस्ता विषयमा बढी चासो देखाएको पाइएको छ।
विद्यालयको शैक्षिक अवस्था सुधार गर्न शिक्षा विकास तथा समन्वय इकाईले पछिल्लो समय अनुगमनलाई तीव्र बनाएको छ। इकाई प्रमुख कृष्णचन्द्र पोखरेलले गत भदौ २१ गते जिम्मेवारी सम्हालेयता विद्यालय अनुगमन थालिएको बताए। उनका अनुसार समितिका पदाधिकारीलाई आफ्नो जिम्मेवारी र कानुनले तोकेको कार्यक्षेत्रबारे अभिमुखीकरण गराउनुपर्ने देखिएको छ।
अनुगमनका क्रममा शिक्षक तथा प्रधानाध्यापकले कक्षाकोठाको शिक्षण अभ्यास अवलोकन गरेर प्राविधिक सहयोग गर्न सुझाव दिएका छन्। त्यसका लागि विज्ञसहितको टोली बनाएर विद्यालय अनुगमन गर्ने तयारी भइरहेको पोखरेलले जानकारी दिए। उनले अनुगमनको विवरण सम्बन्धित मन्त्रालय र विभागमा पठाइएको र स्थानीय तहसँग समन्वय गरिएको बताए। अनुगमनमा राजनीतिक हस्तक्षेपको अनुभूति नभएको उनको भनाइ छ।
आफूले थालेको कामलाई केही समयका लागि गरिएको देखावटी प्रयासका रूपमा व्याख्या गर्ने र नकारात्मक टिप्पणी गर्ने गरिएको गुनासो गर्दै पोखरेलले यस्ता टिप्पणीले काम गर्ने उत्साहमा असर पर्ने बताए। उनले शिक्षकहरूले अनुगमनलाई निरन्तरता दिन र विद्यालयका समस्या पहिचान गरी सुझाव दिन आग्रह गरेको उल्लेख गरे।
इकाईका अनुसार चितवनमा सामुदायिक, संस्थागत र धार्मिक गरी ४९७ विद्यालय सञ्चालनमा छन्। तीमध्ये ३२५ सामुदायिक, १६५ संस्थागत र सात धार्मिक विद्यालय छन्। चितवन २०७१ सालमै साक्षर जिल्ला घोषणा भएको थियो भने राष्ट्रिय जनगणना २०७८ अनुसार जिल्लाको साक्षरता दर ८३ दशमलव ६८ प्रतिशत छ।
