चितवनमा कात्तिक ११ देखि १४ गतेसम्म परेको लगातारको वर्षाले चाडपर्व लक्षित फूलखेतीमा ठूलो नोक्सानी पुर्याएको छ। फुलिसकेका फूलमा पानी परेपछि किसानहरू निराश भएका छन्।
भरतपुर महानगरपालिका–२६ का किसान दीपक पाख्रिनका अनुसार उनले लगाएको सयपत्रीमध्ये फुलिसकेको करिब ७० प्रतिशत फूल नष्ट भएको छ। उनले दुई बिघा जमिनमा सयपत्री लगाएका थिए। एक बिघामा खेती गर्न एक लाख ५० हजार रुपैयाँभन्दा बढी खर्च लाग्ने गरेको उनले बताए। पानी परेपछि फूलका हाँगा भाँचिएका छन् भने चिसो फूल टिपेर पठाउँदा कालो हुने समस्या देखिएको छ।
पाख्रिनले दसैँपछि फूल टिपेर माला बनाएर भण्डारण गर्ने योजना बनाएका थिए, तर वर्षाले त्यो सम्भव भएन। बजारमा माग नभएकाले फूल टिपेर पठाउन पनि सकिएको थिएन।
जिल्ला कृषि विकास कार्यालय चितवनकी बागवानी विकास अधिकृत स्वस्तिका चौहानका अनुसार जिल्लामा लगाइएको फूलमध्ये ६० देखि ७० प्रतिशत फूल फुलिसकेको थियो। फुलिसकेको फूलमध्ये ५० प्रतिशतभन्दा बढीमा क्षति पुगेको छ भने कोपिला लागेका फूलमा भने क्षति भएको छैन।
यस वर्ष जिल्लामा ४४ हेक्टर क्षेत्रफलमा फूलखेती गरिएको छ। प्रतिहेक्टर एक हजार किलो फूल उत्पादन हुने अनुमान छ। उत्पादनले जिल्लाको माग मात्र नभई छिमेकी जिल्लाको माग पनि धान्ने देखिन्थ्यो, तर फूलमा क्षति पुगेपछि बजारमा फूलको मूल्य बढ्ने अनुमान गरिएको छ। गत वर्षको तुलनामा यस वर्ष मूल्य बढ्ने देखिएको चौहानले बताइन्।
गत वर्ष जिल्लामा २१ दशमलव ९२ हेक्टरमा सयपत्री लगाइएको थियो भने यस वर्ष क्षेत्रफल बढेर ४४ हेक्टर पुगेको छ। गत वर्ष जिल्लामा सयपत्रीबाट १३१ दशमलव चार मेट्रिक टन फूल उत्पादन भएको थियो। यस वर्ष टिनिस १, थाई टिनिस, टिनिस २, सुमति र कर्मा ५५५ जातका बिरुवा रोपिएको छ। जिल्लाका सातै पालिकामा व्यावसायिक रूपमा चाडपर्व लक्षित फूलखेती हुँदै आएको छ, जसमध्ये सबैभन्दा धेरै भरतपुर महानगरपालिकामा छ।
थोरै जमिनमा पनि राम्रो आम्दानी हुने भएकाले किसानहरू सयपत्री खेतीतर्फ आकर्षित भएका हुन्। गत वर्ष पाएको मूल्य र बजारमा देखिएको अभावले यस वर्ष खेती बढेको चौहानले बताइन्। नेपाली सयपत्रीको माग बढ्दै गएको उनको भनाइ छ।
