काठमाडौँ — अभिनेत्री बेनिशा हमालले नेपाली दर्शकका लागि नयाँ डिजिटल मनोरञ्जन मञ्च ‘मेरोस्ट्रिम’ सुरु गरेकी छन्। यो ओटीटी प्लेटफर्ममार्फत दर्शकले चलचित्र, वृत्तचित्र, लघुचलचित्र, शो र वेब सिरिज एउटै सदस्यतामा हेर्न पाउनेछन्।
नेपालमा इन्टरनेट र स्मार्टफोनको प्रयोग उल्लेख्य रूपमा बढिसकेको छ, तर नेपाली सामग्री हेर्न भरपर्दो र व्यवस्थित डिजिटल ठाउँको अभाव अझै छ। दर्शकले मनपर्ने नेपाली सामग्री खोज्दा यूट्युबमा छरिएका भिडियो हेर्नुपर्ने वा सिनेमा हलमा सीमित समय कुर्नुपर्ने बाध्यता छ। यही समस्या समाधान गर्ने लक्ष्यसहित मेरोस्ट्रिम सञ्चालनमा ल्याइएको बेनिशाले बताएकी छन्।
प्लेटफर्मले दर्शकको आवश्यकता र खर्च गर्न सक्ने क्षमताअनुसार बेसिक, स्ट्यान्डर्ड र प्रिमियम गरी तीनवटा सदस्यता योजना ल्याएको छ। तीनवटै योजनामा विज्ञापनबिना सामग्री हेर्न पाइन्छ, एउटा खातामा चारवटासम्म प्रोफाइल बनाउन सकिन्छ र क्रोमकास्ट वा एयरप्लेमार्फत टेलिभिजनमा हेर्ने सुविधा छ।
लामो अवधिको योजना लिँदा मासिक खर्च कम पर्छ। छ महिनाको योजनामा १० प्रतिशत र वार्षिक योजनामा २० प्रतिशतसम्म बचत हुने प्लेटफर्मले जनाएको छ। कुनै सामग्रीका लागि छुट्टै शुल्क, भाडा वा क्रेडिट तिर्नुपर्दैन र सम्झौता वा सेट-अप शुल्क पनि लाग्दैन।
