सोलुखुम्बुको लुक्लाभन्दा माथि पर्ने फुर्चेमा अवतरण गर्ने क्रममा दुई वटा हेलिकप्टर एकआपसमा ठोक्किएर पल्टिएका छन्। मंगलबार बिहान करिब सवा आठ बजेतिर भएको यस घटनामा फिसटेल एयर र एयर डाइनास्टीका हेलिकप्टर संलग्न रहेको नेपाल नागरिक उड्डयन प्राधिकरणले जनाएको छ।
प्राधिकरणका सूचना अधिकारी ज्ञानेन्द्र भूलका अनुसार अवतरण गर्ने क्रममा दुई हेलिकप्टरका पंखा आपसमा छोएपछि दुवै हेलिकप्टर पल्टिएका हुन्। घटनालगत्तै प्राधिकरणको टोली लुक्लाबाट दुर्घटनास्थलतर्फ प्रस्थान गरेको छ।
घटनामा मानवीय क्षति भए वा नभएको भन्नेबारे अहिलेसम्म कुनै आधिकारिक जानकारी प्राप्त भएको छैन। प्राधिकरणले स्थलगत टोलीले विवरण संकलन गरेपछि थप जानकारी सार्वजनिक गर्ने बताएको छ।
फुर्चे लुक्ला विमानस्थलभन्दा माथिल्लो क्षेत्रमा पर्ने ठाउँ हो, जहाँ हिमाली क्षेत्रमा उडान गर्ने हेलिकप्टरहरूले प्रायः अवतरण गर्ने गर्छन्।
