पोखरा — गण्डकी प्रदेश टेनिस सङ्घको आयोजनामा पोखरामा पहिलो संस्करणको राष्ट्रिय जुनियर टेनिस च्याम्पियनसिप–२०२६ हुने भएको छ । कात्तिक १८ देखि २१ गतेसम्म पोखरा रङ्गशाला टेनिस कम्प्लेक्समा हुने प्रतियोगितामा देशभरका ४३ जना खेलाडीले प्रतिस्पर्धा गर्नेछन् ।
नेपाल टेनिस सङ्घको स्वीकृतिमा हुने प्रतियोगितामा कास्की जिल्ला टेनिस सङ्घले प्राविधिक सहयोग गर्नेछ । आठ वर्षदेखि १८ वर्षमुनिका बालिका तथा बालक खेलाडीले विभिन्न उमेर समूहमा एकल र युगल विधामा खेल्नेछन् । प्रतियोगितामा यू–८, यू–९, यू–१०, यू–१२, यू–१४, यू–१६ र यू–१८ समूहका खेलाडी सहभागी हुनेछन् । विजेतालाई आकर्षक उपहार प्रदान गरिने आयोजकले जनाएको छ ।
राष्ट्रियस्तरमा प्रतिभाशाली जुनियर खेलाडी पहिचान गर्ने, टेनिसको विकास गर्ने, खेलाडीको क्षमता बढाउने र खेल संस्कृति प्रवर्द्धन गर्ने उद्देश्यले प्रतियोगिता आयोजना गरिएको प्रतियोगिता संयोजक लोकबहादुर गुरुङले बताए ।
सङ्घले स्थापनाकालदेखि नै जुनियर प्रशिक्षण र खेलाडी उत्पादनलाई प्राथमिकता दिँदै आएको छ । पछिल्ला तीन वर्षमा एक दर्जनभन्दा बढी खेलाडी राष्ट्रिय जुनियर वरियतामा पर्न सफल भएका छन् भने केहीले नेपालको प्रतिनिधित्व गर्दै अन्तर्राष्ट्रिय प्रतियोगितामा सहभागिता जनाइसकेका छन् ।
विभिन्न विद्यालयमा समेत प्रशिक्षण सञ्चालन गरिरहेको सङ्घले प्रतिभावान् बालबालिकाको पहिचान, गुणस्तरीय प्रशिक्षण र प्रतियोगितामा सहभागिताको अवसरमार्फत राष्ट्रिय तथा अन्तर्राष्ट्रियस्तरका खेलाडी उत्पादन गर्ने लक्ष्य राखेको आयोजक गण्डकी प्रदेश टेनिस सङ्घका अध्यक्ष विनोद कायस्थले बताए । पोखरालाई टेनिसको महत्वपूर्ण केन्द्रका रूपमा स्थापित गर्ने उद्देश्य रहेको उनको भनाइ छ । प्रतियोगिताको मुख्य प्रायोजन ट्रयाङक्युलिटी स्पाले गरेको छ भने सम्पूर्ण तयारी पूरा भएको आयोजकले जनाएको छ ।
