काठमाडौँ । ऊर्जा, जलस्रोत तथा सिँचाइ मन्त्रालयले चालु आर्थिक वर्षको पहिलो त्रैमासिकमा नदी नियन्त्रणतर्फ ३४ दशमलव नौ प्रतिशत प्रगति हासिल गरेको जनाएको छ । त्रैमासिक लक्ष्यको तुलनामा भारित भौतिक प्रगति यही दरमा पुगेको मन्त्रालयले बताएको हो ।
मन्त्रालयअन्तर्गतको नदी तथा जल उत्पन्न विपद् व्यवस्थापन महाशाखाका प्रमुख रवीन्द्रबहादुर थापाका अनुसार नदी नियन्त्रण कार्यक्रमका लागि चालु आवमा पाँच अर्ब २० करोड ९० लाख रुपैयाँ बजेट विनियोजन भएको थियो । पहिलो त्रैमासिकमा छुट्याइएको ६२ करोड ७४ लाख रुपैयाँमध्ये १४ करोड ७० लाख रुपैयाँ खर्च भएको छ, जुन त्रैमासिक बजेटको २३ दशमलव चार प्रतिशत हो ।
सो अवधिमा दुई दशमलव नौ किलोमिटर तटबन्ध निर्माण भएको छ भने एक हेक्टर जग्गा उकास भएको महाशाखाले जनाएको छ । खर्चको तुलनामा भौतिक प्रगति केही अगाडि देखिए पनि समग्रमा त्रैमासिक लक्ष्य पूरा हुन सकेको छैन ।
केही आयोजनाले भने त्रैमासिक लक्ष्यभन्दा उल्लेखनीय काम गरेका छन् । सिँचाइ तथा जलस्रोत व्यवस्थापन आयोजना, भरतपुर (चितवन) ले त्रैमासिक भौतिक लक्ष्यको १६० दशमलव आठ प्रतिशत प्रगति हासिल गरेको छ । टार–बजार संरक्षण कार्यक्रमले लक्ष्यको १०८ प्रतिशत प्रगति गरेको छ ।
त्यस्तै लमही (दाङ) ले ८६ दशमलव पाँच प्रतिशत, कञ्चनपुरले ८२ दशमलव पाँच प्रतिशत र जनकपुर (धनुषा) ले ८२ दशमलव तीन प्रतिशत भौतिक प्रगति हासिल गरेका छन् । मनसुनपछि बाढीको जोखिम बढिरहेका बेला नदी नियन्त्रणका कामको गति र बजेट खर्चको अवस्थालाई लिएर चासो बढेको छ ।
