विराटनगर । उद्योग सङ्गठन मोरङको आयोजनामा विराटनगरमा विराट एक्स्पो २०२६ आगामी पुस २ देखि ११ गतेसम्म सञ्चालन हुने भएको छ । विराटनगर–१४ स्थित डिग्री क्याम्पस परिसरमा हुने नवौँ संस्करणको एक्स्पोमा २७५ भन्दा बढी स्टल राखिने आयोजकले जनाएको छ । बुधबार विराटनगरमा पत्रकार सम्मेलन गरी सङ्गठनले एक्स्पोको तयारी र कार्यक्रमबारे जानकारी गराएको हो ।
यस पटक एक्स्पोको मूल नारा ‘द इकोसिस्टम अफ अपरच्युनिटिज’ राखिएको छ । अध्यक्ष नन्दकिशोर राठीका अनुसार यसपटकको एक्स्पो विगतका संस्करणभन्दा फरक ढाँचामा आयोजना हुँदैछ — यो प्रदर्शनीमा मात्र सीमित नभई उद्योगी, व्यवसायी, युवा, विद्यार्थी, लगानीकर्ता र उद्यमीलाई अवसरसँग जोड्ने व्यावसायिक मञ्चका रूपमा विकास गरिँदैछ ।
एक्स्पोमा १० वटा अवसर क्षेत्र र ६ वटा एकीकृत प्लेटफर्ममार्फत गतिविधि सञ्चालन हुनेछन् । विद्यार्थी र युवालाई करियर मार्गदर्शन, रोजगारी र सीप विकाससँग जोड्ने ‘लर्न फर द फ्युचर’ कार्यक्रम सञ्चालन हुनेछ भने स्टार्टअप तथा उद्यमशीलता प्याभिलियनमा नयाँ सोच र नवप्रवर्तनलाई प्रोत्साहन गरिनेछ ।
‘विराट बिजनेस समिट २०२६–अपरच्युनिटी कनेक्ट’ तीन दिन चल्नेछ, जसमा देशभरका उद्योगी, लगानीकर्ता र नीति निर्माता सहभागी हुनेछन् । कोशी प्रदेशका १४ वटै जिल्लाका उद्योग वाणिज्य सङ्घले आ–आफ्नो क्षेत्रको आर्थिक सम्भावना प्रस्तुत गर्नेछन् भने नेपाल–भारत र नेपाल–बङ्गलादेश बिजनेस फोरम तथा बीटुबी बैठक पनि हुनेछन् ।
एक्स्पोमा करिब १५० औद्योगिक तथा कर्पोरेट, ५० कृषि तथा साना उद्यम, २० अटोमोबाइल र १२ खाद्य स्टल रहनेछन् । यस वर्ष करिब दुई लाख ५० हजार अवलोकनकर्ता, ३०० भन्दा बढी कम्पनीको सहभागिता, २५ हजार विद्यार्थी र एक हजार पाँच सयभन्दा बढी व्यावसायिक सम्पर्क निर्माणको लक्ष्य छ । करिब दुई हजार युवालाई रोजगारीसँग जोड्ने र कम्तीमा २० लगानीयोग्य स्टार्टअपलाई लगानीकर्तासमक्ष प्रस्तुत गर्ने लक्ष्यसमेत राखिएको छ ।
