बेइजिङ । एक पाकिस्तानी अन्तरिक्ष यात्री चीनको शेन्झोउ–२४ अन्तरिक्ष यानको चालक दलमा सहभागी हुने भएका छन् । यससँगै उनी चीनको अन्तरिक्ष स्टेसनमा पुग्ने पहिलो विदेशी नागरिक बन्नेछन् ।
चीनको सरकारी समाचार संस्था सिन्ह्वाका अनुसार चाइना म्यान्ड स्पेस एजेन्सीले ती पाकिस्तानी यात्रीले अन्तरिक्ष कक्षमा छोटो अवधिको उडान पूरा गर्ने जनाएको छ । उडानपछि उनी शेन्झोउ–२३ यानमार्फत पृथ्वीमा फर्कनेछन् । उडानको मिति भने सार्वजनिक गरिएको छैन ।
यो मिसन चीनको मानवसहितको अन्तरिक्ष कार्यक्रमको इतिहासमा चिनियाँ र विदेशी यात्री सहभागी हुने पहिलो संयुक्त उडान हुनेछ । यसअघि यसै वर्ष दुई पाकिस्तानी उम्मेदवार मुहम्मद जीशान अली र खुर्रम दाउदले चिनियाँ समकक्षीसँगै तालिम सुरु गरेका थिए । उनीहरूमध्ये एक जनालाई छोटो अवधिको मिसनका लागि पेलोड विशेषज्ञका रूपमा छनोट गर्ने योजना छ ।
तालिममा अन्तरिक्ष यान सञ्चालनसम्बन्धी व्यावहारिक सीपका साथै चिनियाँ भाषाको गहन प्रशिक्षण पनि समावेश गरिएको थियो । यो उडान सन् २०२५ को फेब्रुअरीमा चीन र पाकिस्तानबीच भएको अन्तरिक्ष सहकार्यसम्बन्धी सम्झौताको हिस्सा हो । चीनले सन् २०३० सम्ममा चन्द्रमामा पहिलो पटक मानवसहितको अवतरण गराउने लक्ष्य राखेको छ भने अमेरिकी अन्तरिक्ष निकाय नासाले सन् २०२८ मा चन्द्रमाको सतहमा यात्री अवतरण गराउने लक्ष्य राखेको छ ।
