सिरहाको धनगढीमाई नगरपालिका–१०, जिरोमाइलमा रहेको एक निजी विद्यालयमा अध्ययनरत बालिकामाथि यौन दुरुपयोग गरेको आरोपमा त्यही विद्यालयका एक शिक्षक पक्राउ परेका छन्।
पक्राउ पर्ने शिक्षक विश्वशान्ति एकेडेमीमा दैनिक प्रशासनको जिम्मेवारीसमेत सम्हाल्दै अध्यापन गराउँदै आएका करिब २५ वर्षीय सौगात लुइँटेल हुन्। उनीमाथि करिब साढे तीन वर्षीया बालिकामाथि जबर्जस्ती करणी गरेको आरोप लागेको छ। प्रहरीले उनलाई गत मंगलबार पक्राउ गरी सिरहा जिल्ला अदालतबाट म्याद थप गरेर अनुसन्धान अघि बढाएको छ।
पीडित बालिकाको धरानस्थित बीपी कोइराला स्वास्थ्य विज्ञान प्रतिष्ठानमा स्वास्थ्य परीक्षण गरिएको र त्यसपछि उनलाई परिवारको जिम्मा लगाइएको प्रहरीले जनाएको छ।
परिवारले प्रहरीमा दिएको जाहेरीअनुसार शिक्षकले ८ कात्तिकदेखि १२ कात्तिकसम्म टिफिनको समयमा बालिकालाई कार्यालयमा बोलाएर चकलेट दिने बहानामा पटक–पटक दुरुपयोग गर्दै आएका थिए। बालिकाले १७ कात्तिकमा रुँदै आफूमाथि भएको घटना सुनाएपछि मात्र परिवारले थाहा पाएको थियो।
यसैबीच पीडित परिवारले केही राजनीतिक दलका नेतामार्फत विद्यालय सञ्चालकले जाहेरी फिर्ता लिन आर्थिक प्रलोभनसहित दबाब र धम्की दिइरहेको गुनासो गरेको छ। प्रहरीले भने अनुसन्धानमा कुनै दबाब नपर्ने र दोषीमाथि कानुनबमोजिम कारबाही हुने जनाएको छ।
घटनापछि महिला मानव अधिकार रक्षक राष्ट्रिय सञ्जालले विज्ञप्ति जारी गर्दै निष्पक्ष अनुसन्धान, पीडितको सुरक्षा र न्याय सुनिश्चित गर्न माग गरेको छ। सञ्जालकी अध्यक्ष श्यामकुमारी साहले बालिकामाथि हुने यौन हिंसा कुनै पनि अवस्थामा स्वीकार्य हुन नसक्ने बताउँदै पीडितको गोपनीयता, स्वास्थ्य उपचार र कानुनी सहायतामा राज्यले ध्यान दिनुपर्ने उल्लेख गरेकी छन्।
