काठमाडौँ । जनआस्था साप्ताहिकका प्रधानसम्पादक किशोर श्रेष्ठलाई छलफलका लागि भन्दै नेपाल प्रहरीको साइबर ब्युरोमा लगिएको छ । आज बिहान ब्युरोको टोली उनलाई लिन नख्खुस्थित निवासमै पुगेको थियो । ब्युरोका उच्च अधिकारीहरूले श्रेष्ठविरुद्ध ठाडो निवेदन परेकाले छलफलका लागि ल्याइएको बताएका छन् ।
श्रेष्ठविरुद्ध राष्ट्रिय स्वतन्त्र पार्टीका केन्द्रीय सदस्य हिमेश पन्तले हिजो ब्युरोमा निवेदन दिएका थिए । समाचारको विषयलाई लिएर दुवै पक्षबिच विवाद चलेपछि पन्तले निवेदन दिएका हुन् भने पत्रकार श्रेष्ठले पनि पन्तविरुद्ध ब्युरोमा जाहेरी दिएका छन् । ब्युरो स्रोतका अनुसार दुवै पक्षलाई सँगै राखेर छलफल गराउने तयारी भइरहेको छ ।
श्रेष्ठलाई यसअघि गत साउन २७ गते काठमाडौँ प्रहरी परिसरले नियन्त्रणमा लिएको थियो । त्यसबेला प्रहरीले उनको निवास र घरमा खानतलासी गर्दै ल्यापटप, कम्प्युटरलगायत विद्युतीय सामग्री नियन्त्रणमा लिएको थियो ।
बन्दीप्रत्यक्षीकरणको रिट परेपछि सर्वोच्च अदालतले श्रेष्ठलाई थुनामुक्त गर्न परमादेश जारी गरेको थियो । अदालतले हाजिरी जमानी वा तारिखमा राखेर अनुसन्धान अघि बढाउन आदेश दिएपछि उनी गत भदौ १ गते हिरासतमुक्त भएका थिए ।
