इलाम । इलामको रोङ गाउँपालिका–३ पात्लेडाँडामा एक पुरुषको शव फेला परेको छ । स्थानीय ५५ वर्षीय कमल परियार शनिबार बिहान आफ्नै घरको बरण्डामा मृत अवस्थामा भेटिएका हुन् । उनको दाहिने खुट्टा, बायाँ हात र टाउकोमा धारिलो हतियारले प्रहार गरिएका चिह्न देखिएको प्रहरीले जनाएको छ ।
स्थानीय बासिन्दाले बिहान ८ः३० बजे घटनाबारे खबर गरेपछि प्रहरी टोली घटनास्थल पुगेको थियो । प्रहरीले घटनास्थल सुरक्षित राखी अनुसन्धान अघि बढाएको छ भने घटनास्थलबाट एउटा हतियार समेत बरामद गरिएको छ ।
प्रारम्भिक अनुसन्धानअनुसार परियार पछिल्ला चार वर्षदेखि घरमा एक्लै बस्दै आएका थिए । घटनामा संलग्न भएको आशङ्का गरिएको व्यक्ति अहिलेसम्म फरार रहेको र उनको खोजी जारी रहेको प्रहरीको भनाइ छ । थप अनुसन्धान भइरहेको छ ।
