काठमाडौँ । गत भदौ १० मा रसुवाको भोटेकोशी–त्रिशूली करिडोरमा आएको विनाशकारी बाढीको क्षति सम्बोधन गर्न संयुक्त राष्ट्रसङ्घीय जलवायु संरचनाअन्तर्गतको हानि तथा नोक्सानी कोषको सञ्चालक समितिको आकस्मिक बैठक आगामी कात्तिक ५ गते बस्ने भएको छ। कोषले २६ सदस्यीय बोर्डको विशेष भर्चुअल बैठक आह्वान गरेको हो।
नेपाल सरकारले भदौ १५ मा कोषसमक्ष र्यापिड रेस्पोन्स संयन्त्रमार्फत आपत्कालीन आर्थिक सहायता माग गर्दै औपचारिक पत्राचार गरेको थियो। जलवायु वित्त विज्ञ राजु पण्डित क्षेत्रीका अनुसार यसैलाई बैठकको मुख्य एजेण्डा बनाइएको छ। ‘कोषको विधानमै आकस्मिक बैठकको व्यवस्था भए पनि कुनै देशका लागि यस्तो बैठक डाकिएको यो पहिलो घटना हो,’ उनले बताए।
बैठकले नेपाललाई करिब २० मिलियन अमेरिकी डलर (२ अर्ब ७० करोडदेखि ३ अर्ब रुपैयाँ) सहायता दिने निर्णय गर्न सक्ने सम्भावना बलियो रहेको क्षेत्रीको भनाइ छ। बोर्डमा विकासशील १४ र विकसित १२ मुलुक रहने र मतदानबिना सर्वसम्मतिका आधारमा निर्णय हुने भएकाले वातावरण अनुकूल रहेको उनले बताए।
तर सहयोग स्वीकृत भए पनि रकम तत्कालै हात पर्ने सम्भावना कम छ। तत्काल रकम तोकेर दिने, खर्च योजना र ढाँचा माग्ने वा डिसेम्बरमा बस्ने बोर्डको दशौँ बैठकबाट अन्तिम निकासा गर्ने — यी तीन विकल्पमध्ये कुनै एकमा निर्णय हुन सक्नेछ।
