सिरहा — लामो प्रतीक्षापछि सिरहाको गोलबजारदेखि लगडी गदियानीसम्मको सडकमा कालोपत्रेको काम सुरु भएको छ। शुक्रबारदेखि थालिएको कालोपत्रेले छ वर्षदेखि धुलो र धुवाँमा यात्रा गर्न बाध्य स्थानीयमा खुसी छाएको छ।
हुलाकी निर्देशनालय कार्यालय जनकपुरले २०७७ भदौ २४ गते यो सडक निर्माणको ठेक्का सम्झौता गरेको थियो। सम्झौताअनुसार ३० महिनाभित्र अर्थात् २०७९ फागुन २३ सम्म निर्माण सम्पन्न गर्नुपर्ने थियो। ठेक्का रकम ९१ करोड ३९ लाख ७९ हजार ६० रुपैयाँ रहेको छ।
तर तोकिएको समयमा काम सम्पन्न हुन सकेन। निर्देशनालयले पहिलो पटक २०८० फागुन २२ र दोस्रो पटक २०८१ फागुन २२ सम्म गरी एक–एक वर्ष म्याद थप्यो। त्यसपछि पनि काम नसकिएपछि तेस्रो पटक असार मसान्तसम्मको समय दिइएको छ। नयाँ म्याद पाएपछि निर्माण कम्पनीले कालोपत्रेको काम अघि बढाएको हो।
निर्माण कम्पनीका साइट इन्चार्ज बेचन साहले राजनीतिक, जनप्रतिनिधि तथा सर्वसाधारणबाट अवरोध नभए तोकिएको म्यादभित्रै काम सकिने बताए। उनका अनुसार छठपर्वसम्म चार किलोमिटर सडक कालोपत्रे गर्ने र छठपछि बाँकी काम निरन्तर अघि बढाउने लक्ष्य छ।
हुलाकी निर्देशनालय कार्यालय जनकपुरका सबइन्जिनियर नारेन्द्र यादवका अनुसार निर्माण कम्पनीले हालसम्म ठेक्का रकमको करिब ४० प्रतिशत भुक्तानी पाइसकेको छ भने सडकको भौतिक प्रगति करिब ४५ प्रतिशत पुगेको छ।
