चाडपर्वको रौनकबीच सडकमा कोलाहल मच्चाउने सवारीसाधनमाथि प्रहरीले कडाइ गरेको छ। तिहारको समयमा अत्यधिक आवाज निकाल्ने गरी परिमार्जन गरिएका २५ वटा मोटरसाइकल काठमाडौं प्रहरीले नियन्त्रणमा लिएको छ।
जिल्ला प्रहरी परिसर काठमाडौंका अनुसार पर्वका दिनहरूमा सर्वसाधारणले शान्त र सुरक्षित वातावरणमा आवतजावत गर्न सकून् भन्ने उद्देश्यले प्रहरीले सडकमा चेकजाँच र निगरानी बढाएको थियो। आइतबार राजधानीका विभिन्न ठाउँमा खटिएका प्रहरी टोलीले सवारीको स्वरूप फेरेर चर्को आवाज निकाल्ने मोटरसाइकलहरू फेला पारेका हुन्।
प्रहरीले नियन्त्रणमा लिएका मोटरसाइकलहरूको अवस्था र परिमार्जनको प्रकृतिबारे थप छानबिन भइरहेको जनाएको छ। चाडपर्वको बेला यस्ता सवारीले सर्वसाधारणलाई हैरानी पार्ने र सडक सुरक्षामा समेत जोखिम बढाउने भएकाले प्रहरीले निगरानीलाई निरन्तरता दिने जनाएको छ।
तिहारमा सवारी चाप बढ्ने भएकाले प्रहरीले चालकहरूलाई नियम पालना गर्न र सवारीको स्वरूप नफेर्न आग्रह गरेको छ। नियम उल्लंघन गर्ने सवारीमाथि कारबाही जारी रहने प्रहरीको भनाइ छ।
