पोखराका उद्योगी व्यवसायी र थाइल्यान्डबाट आएको प्रतिनिधिमण्डलबीच व्यापारिक साझेदारी बढाउने विषयमा बिहीबार छलफल भएको छ। दुवै पक्षले पर्यटन, सूचना प्रविधि र व्यापारका क्षेत्रमा मिलेर काम गर्ने सहमति जनाएका छन्। लगानी बढाउने र एकअर्काको बजारमा पहुँच सहज बनाउने विषय पनि छलफलमा उठेको थियो।
थाइल्यान्डको उद्योग मन्त्रालयका सल्लाहकार दीपेन्द्र देसारको नेतृत्वमा आएको टोलीसँग पोखरा उद्योग वाणिज्य सङ्घका पदाधिकारीले कुराकानी गरेका हुन्। लामो समयदेखि थाइल्यान्डमा बस्दै आएका नेपालीमूलका देसार सूचना प्रविधि, पर्यटन तथा आयात–निर्यात व्यवसायमा आबद्ध छन्। उनले पोखराका व्यवसायीलाई थाइल्यान्डको बजारसम्म पुग्न सहयोग गर्ने प्रतिबद्धता जनाए।
सङ्घका अध्यक्ष शोभा गौतमले थाइल्यान्डका साना तथा मझौला व्यवसायका उत्पादन नेपाली बजारमा ल्याउन र नेपाली उत्पादनलाई थाइल्यान्डमा थप बजार दिलाउन सहकार्य गर्न सकिने बताइन्। नेपालबाट थाइल्यान्डमा गलैँचा, मासु र स्टेसनरी सामग्री निर्यात हुँदै आएको उल्लेख गर्दै उनले निर्यात बढाउन गुणस्तर सुधारमा सहयोग गर्न आग्रह गरिन्।
बौद्धमार्गी थाइल्यान्ड र बुद्धको जन्मभूमि नेपालबीच पर्यटन आदानप्रदानको ठूलो सम्भावना रहेको उनको भनाइ थियो। अन्नपूर्ण पदयात्रा मार्गको प्रवेशद्वार पोखरामा अन्तर्राष्ट्रिय होटलका चेनहरू आइसकेको उल्लेख गर्दै उनले थाई व्यवसायीलाई होटल तथा रेस्टुरेन्ट सञ्चालन र पर्यटनमा लगानी गर्न सङ्घले सहजीकरण गर्ने बताइन्।
छलफलमा थाई टोलीले दुवै देशका व्यवसायी सहभागी हुने बिजनेस एक्सपो गर्ने प्रस्ताव राखेको थियो। त्यसप्रति सकारात्मक प्रतिक्रिया जनाउँदै अध्यक्ष गौतमले सङ्घ यस्तो कार्यक्रम गर्न इच्छुक र सक्षम रहेको बताइन्। देसारले भ्रमणको उद्देश्य दुई देशका व्यवसायीबीच दीर्घकालीन सम्बन्ध बनाउनु रहेको र थाई लगानी नेपाल भित्र्याउन तथा थाई उत्पादन आयात गर्ने व्यवसायीलाई सहयोग गर्न तयार रहेको बताए।
