काठमाडौं । दसैं पर्वको समयमा विद्युत् आपूर्ति निरन्तर राख्न नेपाल विद्युत् प्राधिकरणले विशेष तयारी सुरु गरेको छ । चाडपर्वभरि बिजुलीमा अवरोध हुन नदिन देशभरका सबै वितरण केन्द्रलाई तयारी अवस्थामा रहन निर्देशन दिइएको हो ।प्राधिकरणका कार्यकारी निर्देशक दीर्घायुकुमार श्रेष्ठ र वितरण तथा ग्राहक सेवा निर्देशनालयका प्रमुख राजन ढकालले भर्चुअल बैठकमार्फत प्रादेशिक तथा प्रदेश डिभिजन कार्यालयका वितरण केन्द्र प्रमुखहरूलाई दसैं अवधिमा विद्युत् आपूर्ति नियमित राख्ने सबै तयारी पूरा गर्न भनेका हुन् ।दसैंका बेला औद्योगिक र व्यावसायिक प्रतिष्ठानको चल्ने क्रम घटे पनि घर, धार्मिक स्थल, बजार र सार्वजनिक क्षेत्रमा विद्युत् खपतको प्रकृति फरक हुने भएकाले प्रणाली सुरक्षित र भरपर्दो रूपमा चलाउन प्राधिकरणले उच्च प्राथमिकता दिएको छ ।विद्युत् आपूर्तिमा अवरोध आए तुरुन्त मर्मतसम्भार गरेर सेवा सुचारु गर्न प्राविधिक टोलीलाई तयारीमा राख्न निर्देशन दिइएको छ । प्रसारण लाइन र वितरण प्रणालीको बाँकी निरीक्षण तथा मर्मत तत्काल पूरा गरी सम्भावित अवरोध घटाउन पनि भनिएको छ ।’नो लाइट’ सेवामा प्राप्त कल तुरुन्त उठाउने र गुनासो व्यवस्थापन थप प्रभावकारी बनाउन पनि निर्देशन दिइएको छ । समस्या देखिए तुरुन्त प्राविधिक टोली परिचालन गरेर छिटो सेवा पुनः सुरु गर्ने व्यवस्था मिलाउन कार्यालय प्रमुखलाई भनिएको छ । प्राधिकरणले माग–आपूर्तिको अवस्था निरन्तर निगरानी गर्ने जनाएको छ ।यसैगरी प्राधिकरणले उपभोक्तालाई घरका विद्युतीय उपकरण र तार जाँच गर्न, गुणस्तरहीन सामग्री प्रयोग नगर्न, चुहावट वा तारमा समस्या देखिए आफैं मर्मत नगरी दक्ष प्राविधिकबाट मात्र गराउन, र समस्या भए नजिकको वितरण केन्द्र वा सम्बन्धित ‘नो लाइट’ सेवामा सम्पर्क गर्न आग्रह गरेको छ ।