पूर्वपरराष्ट्रमन्त्री प्रदीप ज्ञवालीले अर्थमन्त्री डा. स्वर्णीम वाग्लेको दिल्लीमा दिएको पछिल्लो अभिव्यक्तिमाथि कडा असहमति जनाएका छन्। वाग्लेले नेपाली राष्ट्रवादलाई भारतविरोधसँग जोड्ने समय सकिएको बताएका थिए, तर ज्ञवालीले नेपालमा त्यस्तो कुनै युग नै नभएको दाबी गरेका छन्।
सामाजिक सञ्जालमार्फत आफ्नो धारणा राख्दै ज्ञवालीले विदेशी भूमिमा बसेर मुलुकभित्रका राजनीतिक मतभेदबारे बोल्नु कुनै पनि सरकारी जिम्मेवारीमा रहेका व्यक्तिका लागि उपयुक्त नहुने बताए। यस्तो अभिव्यक्तिले देशको स्वाभिमान र हितमा असर पर्ने उनको तर्क छ।
नेपालले सधैं सार्वभौम समानता, पारस्परिक लाभ र सम्मानमा आधारित मित्रता खोजेको उनले स्मरण गराए। कुनै व्यक्ति वा सानो समूहको धारणालाई समग्र राष्ट्रको दृष्टिकोण मान्न नमिल्ने र त्यसलाई कुनै युगको नाम दिनु गलत हुने उनको भनाइ छ।
यसअघि नयाँदिल्लीमा आयोजित एनडीटीभी वर्ल्ड समिट २०२६ मा बोल्दै अर्थमन्त्री वाग्लेले नयाँ पुस्ताको प्राथमिकता आर्थिक समृद्धि, राम्रो रोजगारी, सुशासन र असल छिमेकी सम्बन्ध रहेको बताएका थिए। लामो समयको वैचारिक अभ्यासले राष्ट्रवादलाई भारतविरोधसँग जोडेर हेर्ने धारणा बनेको, तर अहिलेको पुस्ता फरक सोच राख्ने उनको भनाइ थियो।
ज्ञवालीले भने नेपाल र भारतबीच सीमा विवाद, सन् १९५० को सन्धिका केही प्रावधान, नेपाली उत्पादनले भारतीय बजारमा भोग्ने अवरोध, बढ्दो व्यापार घाटा, सीमामा बनेका एकतर्फी बाँधका कारण हुने डुबान र वैकल्पिक हवाई मार्गमा देखिएको आनाकानीजस्ता विषय अझै समाधान हुन बाँकी रहेको औंल्याए। यी विषय उठाउनु कुनै मुलुकको विरोध नभई राष्ट्रिय हितको रक्षा भएको र त्यसका लागि राष्ट्रिय एकता तथा गम्भीर कूटनीतिक पहल आवश्यक पर्ने उनले बताए।
