धनुषाको जनकपुरधाम उपमहानगरपालिका–१७ स्थित तेतरिया पुलमा शनिबार राति भएको दुर्घटनामा दुई मोटरसाइकल आपसमा ठोक्किएका थिए। राति करिब १० बजे पौडेश्वरबाट तेतरियातर्फ गइरहेको ज ११ प ३०५८ नम्बरको मोटरसाइकल विपरीत दिशाबाट आइरहेको म.प्र.०२–००९ प ११५७ नम्बरको मोटरसाइकलसँग जुधेको जिल्ला प्रहरी कार्यालय धनुषाले जनाएको छ।
दुर्घटनामा जनकपुरधाम–१७ का सुजित यादवको मृत्यु भएको छ। ज ११ प ३०५८ नम्बरको मोटरसाइकल चलाइरहेका उनको प्रादेशिक अस्पताल जनकपुरमा उपचारकै क्रममा निधन भएको प्रहरी प्रवक्ता डीएसपी ओमप्रकाश खनालले जानकारी दिए। सोही मोटरसाइकलमा सवार २५ वर्षीय बलराम यादवको खुट्टामा चोट लागेको छ र उनको सोही अस्पतालमा उपचार भइरहेको छ। अर्को मोटरसाइकलका चालक कमला नगरपालिका–७ का रामपुकार यादव (२०) र सोही ठाउँका ३४ वर्षीय अखलेश यादव गम्भीर घाइते भएका छन्। उनीहरू दुवै जनाको जनकपुर न्युरो अस्पतालमा उपचार भइरहेको प्रहरीले जनाएको छ।
यसैबीच, उपचारमा ढिलाइ भएको आरोप लगाउँदै मृतकका आफन्तले प्रादेशिक अस्पतालमा तोडफोड गरेका छन्। करिब १५ देखि २० जनाको समूह अस्पताल पुगेर ढुङ्गा प्रहार गरेको प्रहरीको भनाइ छ। ढुङ्गा प्रहार गरेको आरोपमा जनकपुरधाम–१७ का २० वर्षीय गणेश यादवलाई प्रहरीले नियन्त्रणमा लिएको छ भने अरू संलग्नलाई सामान्य बल प्रयोग गरेर तितरबितर पारिएको डीएसपी खनालले बताए।
