नेपाली लोकदोहोरी र आधुनिक संगीतका चिरपरिचित नाम सुरेश अधिकारी करिब डेढ दशक लामो अन्तरालपछि नयाँ दसैँ गीतमार्फत स्रोतामाझ फर्किएका छन्।
बडादसैँको अवसरमा उनले आफ्नै संगीतमा तयार पारेको ‘रातो टीका जमरा’ गीत सार्वजनिक गरेका हुन्। नेपाली समाजमा घुलमिल भएका कतिपय चर्चित दसैँ गीतका सर्जक उनले यो नयाँ गीतबाट आफ्नो सांगीतिक यात्रामा फेरि उज्यालो छाएको बताएका छन्।
सार्वजनिक गीतमा शब्द वेद जोशीको रहेको छ भने स्वर कृष्ण बिक र जुनु रिजालले दिएका छन्। गीतको संगीत संयोजन महाराज थापाले गरेका हुन्। भिडियोमा कलाकार सञ्जय विश्वकर्मा र सञ्जना गुरुङले अभिनय तथा नृत्य गरेका छन्। भिडियोको निर्देशन र कोरियोग्राफी स्वयं सञ्जय विश्वकर्मा (खिम्जन) ले गरेका छन्।
परिवारको मिलन, आत्मीयता, रातो टीका, पहेँलो जमरा र नेपाली मौलिक संस्कृतिलाई जीवन्त ढंगले उतारिएको गीतले दसैँको खुसीयाली वातावरणलाई छवि दिएको छ। लक्षारा फिल्म्सको प्रस्तुति रहेको भिडियो गायक कृष्ण बिकको आधिकारिक युट्युब च्यानलबाट सार्वजनिक गरिएको हो।
