बुधबार देशका छ जिल्लामा भएका छुट्टाछुट्टै सडक दुर्घटनामा छ जनाको ज्यान गएको छ। झापा, मोरङ, तनहुँ, कपिलवस्तु, सुर्खेत र मकवानपुरमा भएका घटनामा मोटरसाइकल, बस र ट्याक्टर संलग्न थिए।
झापाको दमक नगरपालिका–५ मा बुधबार दिउँसो बसले मोटरसाइकललाई ठक्कर दिँदा चालकको मृत्यु भयो। प्र.१-०२-०५३ प ७४३९ नम्बरको मोटरसाइकललाई प्र.१-०१-००१ ख ४२९२ नम्बरको बसले ठक्कर दिएको थियो। मोरङको लेटाङका ५३ वर्षीय मङ्गल प्रसाद साउदेनको विराट टिचिङ अस्पताल विराटनगरमा उपचारका क्रममा मृत्यु भयो। बस चालकलाई प्रहरीले नियन्त्रणमा लिएको छ।
मोरङकै विराटनगर महानगरपालिका–१० निर्मल जलमा गए राति मोटरसाइकल अनियन्त्रित भएर दुर्घटना हुँदा चालकको ज्यान गयो। प्र.१-०४-००१ प ३३७७ नम्बरको मोटरसाइकल चलाइरहेका २४ वर्षीय अङ्कित पोखरेलको विराट नर्सिङ होम विराटनगरमा उपचारका क्रममा मृत्यु भएको प्रहरीले जनाएको छ।
तनहुँको बन्दीपुर गाउँपालिका–४ बिमलनगरमा मोटरसाइकलको ठक्करबाट पैदलयात्री ७० वर्षीया पम्फा बोटेको मृत्यु भयो। बा.प्र.०२-०५५ प १६३९ नम्बरको मोटरसाइकलले ठक्कर दिएपछि उनको अन्नपूर्ण अस्पताल पोखरामा उपचारका क्रममा मृत्यु भएको हो। मोटरसाइकल चालकलाई प्रहरीले नियन्त्रणमा लिएको छ।
कपिलवस्तुको शुद्धोधन गाउँपालिका–२ भुसुडीमा मोटरसाइकलले पैदलयात्रीलाई ठक्कर दिँदा १६ वर्षीय चालक आकाश विकको मृत्यु भयो। लु.९२ प १३०९ नम्बरको मोटरसाइकल चलाइरहेका उनको क्रिमशन अस्पताल बुटवलमा उपचारका क्रममा मृत्यु भएको हो। घाइते पैदलयात्रीको सिटी अस्पताल भैरहवामा उपचार भइरहेको छ।
सुर्खेतको गुर्भाकोट नगरपालिका–९ भालुखोलामा गए राति ट्याक्टर दुर्घटना हुँदा सवार २८ वर्षीय विमल रानाको घटनास्थलमै मृत्यु भयो। भे.२ त ५९ नम्बरको ट्याक्टरका चालक दुर्घटनापछि फरार छन् र प्रहरीले उनको खोजी गरिरहेको छ।
मकवानपुरको भीमफेदी गाउँपालिका–८ ईपादेउरालीमा बुधबार बिहान बसको ठक्करबाट ६३ वर्षीया लीला देवी खत्रीको घटनास्थलमै मृत्यु भयो। बा.२ ख ९४३० नम्बरको बसका चालकलाई प्रहरीले नियन्त्रणमा लिएको छ। सबै घटनाबारे प्रहरीले अनुसन्धान गरिरहेको जनाएको छ।
