देशका विभिन्न जिल्लामा शुक्रबार र शनिबार गरिएको प्रहरी कारबाहीमा लागूऔषधसहित १३ जना पक्राउ परेका छन् । नियमित गस्तीमा खटिएको प्रहरी टोलीले काठमाडौँ, झापा, पर्सा, कैलाली, लमजुङ, सुनसरी र बर्दियाबाट उनीहरूलाई नियन्त्रणमा लिएको केन्द्रीय प्रहरी समाचारकक्षले जनाएको छ । पक्राउ परेकाहरूबाट ब्राउनसुगरजस्तो देखिने पदार्थ, चिकित्सकको सिफारिसबिना किन्न नपाइने औषधि, नगद २० हजार २०० रुपैयाँ र एउटा मोटरसाइकल बरामद भएको छ ।
काठमाडौँ महानगरपालिका–६ चुच्चेपाटीबाट चार ग्राम २५० मिलिग्राम ब्राउनसुगरजस्तो पदार्थ र नगदसहित सिन्धुपाल्चोकको भोटेकोशी गाउँपालिका–३ का ३९ वर्षीय छिरीङ शेर्पा पक्राउ परेका छन् । महानगरपालिका–३२ जडिबुटीबाट छ ग्राम ७४० मिलिग्राम सोही पदार्थसहित थप दुई जना पक्राउ परेका छन् ।
झापा गाउँपालिका–५ खयरबारीबाट एक ग्राम ९५ मिलिग्राम पदार्थसहित बाह्रदशी गाउँपालिका–२ का २४ वर्षीय खड्ग राजवंशी र सोही गाउँपालिका–१ का २५ वर्षीय चैतन हेमरम पक्राउ परेका छन् । वीरगञ्ज महानगरपालिका–१६ बसपार्कबाट डाइजेपाम २७ एम्पुल, फेनारगन २९ एम्पुल र बुप्रेनोर्फिन २८ एम्पुलसहित धादिङको ज्वालामुखी गाउँपालिका–२ का २० वर्षीय निमा लामा शेर्पा पक्राउ परेका छन् ।
कैलालीको धनगढी उपमहानगरपालिका–४ चटकपुरस्थित एक होटलको कोठाबाट १२७ मिलिग्राम पदार्थसहित डोटीको जोरायल गाउँपालिका–२ का २५ वर्षीय अमरबहादुर कुँवर पक्राउ परेका छन् । भजनी नगरपालिका–३ कुसुमघाटबाट एक ग्राम ५० मिलिग्राम पदार्थसहित दुई जना पक्राउ परेका छन्, जसमध्ये रोशन सार्कीले प्रयोग गरेको मोटरसाइकल पनि प्रहरीले नियन्त्रणमा लिएको छ ।
लमजुङको बेँसीसहर नगरपालिका–१ देउरालीडाँडाबाट डाइजेपाम, बुप्रेनोर्फिन र फेनारगन १०/१० एम्पुलसहित बेँसीसहर नगरपालिका–८ भुलभुलेका ३० वर्षीय सुजन तामाङ पक्राउ परेका छन् । सुनसरीको कोशी गाउँपालिका–१ लौकही केराबारीबाट दुई ग्राम १७० मिलिग्राम पदार्थसहित दुहबी नगरपालिका–३ का ३४ वर्षीय दीपक परियार र उदयपुरको बेलका नगरपालिका–३ का ३२ वर्षीय बलबहादुर थापा पक्राउ परेका छन् । बर्दियाको बढैयाताल गाउँपालिका–७ कर्णाली पुलबाट दुई ग्राम ७१० मिलिग्राम पदार्थसहित बाँकेको कोहलपुर नगरपालिका–९ का २१ वर्षीय सुशील परियार पक्राउ परेका छन् । पक्राउ परेका सबैमाथि थप अनुसन्धान भइरहेको प्रहरीले जनाएको छ ।
