श्रीमान् गुमाएपछि लामो समयदेखि आर्थिक अभाव र सामाजिक कठिनाइसँग जुधिरहेकी झापाकी एक महिलाले नेपाली नागरिकता पाएसँगै नयाँ आशा पाएकी छन्। शिवसताक्षी नगरपालिका–८ की पार्वती ऋषिदेवले शुक्रबार वंशजका आधारमा नागरिकता प्राप्त गरेकी हुन्।
पार्वतीका श्रीमान् शंकर ऋषिदेवको निधनपछि उनको जीवन झन् कठिन बनेको थियो। आम्दानीको भरपर्दो स्रोत नहुँदा दैनिक गुजारा चलाउनै मुस्किल थियो। त्यसबाहेक नागरिकता नभएकाले राज्यले दिने सामाजिक सुरक्षा सुविधा उनको पहुँचभन्दा बाहिर थियो।
उनको अवस्थाबारे थाहा पाएपछि वडा नम्बर ८ का अध्यक्ष सन्तकुमार फेउदिनले नागरिकता बनाउने प्रक्रिया अघि बढाएका थिए। उनकै पहलमा पार्वतीले नागरिकता पाइन्। त्यसलगत्तै वडा कार्यालयले उनलाई एकल महिला सामाजिक सुरक्षा परिचयपत्र पनि बनाइदियो। अब उनले चालु आर्थिक वर्षको कात्तिक महिनादेखि मासिक भत्ता पाउनेछिन्।
वडा सचिव पुष्पलाल पाण्डेले परिचयपत्र उनकै घरमा पुगेर हस्तान्तरण गरेका छन्। कार्यालयसम्म जान असहज हुने अवस्थालाई ध्यानमा राखेर घरमै सेवा पुर्याइएको उनले बताए।
नागरिकता पाएपछि पार्वतीले आफ्नो खुसी व्यक्त गर्दै अब भत्ता पाउने भएकामा र मोबाइल पाएकामा सन्तोष व्यक्त गरिन्। घर बनाइदिने आश्वासनले आफूलाई थप हौसला मिलेको उनको भनाइ छ।
तर उनको समस्या पूर्ण रूपमा समाधान भइसकेको छैन। बस्नका लागि सुरक्षित घर नभएकाले वडाध्यक्ष फेउदिनले आगामी मङ्सिरदेखि घर निर्माण सुरु गर्ने योजना सुनाएका छन्। उनले वडाका विपन्न, अपाङ्गता भएका र उपचारमा कठिनाइ भोगिरहेका नागरिकलाई व्यक्तिगत रूपमा सहयोग गर्दै आएको पनि बताए।
