स्ट्रीमर मनिष पाण्डे, जसलाई ‘झापालिस’ नामले चिनिन्छ, उनले प्रधानमन्त्री बालेन्द्र शाहलाई सन्देश पठाएका छन्। असोज २६ गते राति प्रहरीले आफूलाई अपशब्द बोलेकै कारण पक्राउ गरेको भन्दै उनले प्रधानमन्त्रीसमक्ष असन्तुष्टि जनाएका हुन्।झापालिसले सन्देशमा र्‍यापर भिटेन पक्राउ पर्दा बालेनले व्यक्त गरेको अडानको स्मरण गराएका छन्। त्यतिबेला बालेनले भिटेनको समर्थन गर्दै एकदिन सरकारले हिपहप बुझ्नेछ भन्ने धारणा राखेका थिए। मुख छाडेकै भरमा मानिस पक्राउ गर्नु उचित नभएको झापालिसको भनाइ छ।उनले गृहमन्त्री सुधन गुरुङलाई पनि यो विषय स्मरण गराइदिन प्रधानमन्त्रीलाई आग्रह गरेका छन्। आफूले पठाएको सन्देशको स्क्रिनसट उनले इन्स्टाग्राम स्टोरीमा राखेका छन्।असोज २६ गते राति पक्राउ परेका झापालिसलाई सोही राति सामाजिक सञ्जालमा अपशब्द नबोल्न चेतावनी दिएर छाडिएको थियो। पछि आफ्नो स्ट्रिमिङमा उनले प्रहरीले हतकडी लगाएर हिरासतमा राखेको बताएका थिए।युट्युबसहित विभिन्न प्लेटफर्ममा स्ट्रिमिङ गर्ने उनको युट्युब च्यानलमा चार लाख ६३ हजार सदस्य छन्। उनका र्‍याप गीत पनि चर्चित छन्। लामो समय अमेरिका बसेका उनी पछिल्लो समय झापाबाटै स्ट्रिमिङ गर्दै आएका छन्।