२ कात्तिक, काठमाडौं । जापानमा जारी आइची–नागोया एसियन पारा खेलकुदमा नेपाली पारा पौडी खेलाडी हर्कमान घर्तीले देशकै नाममा ऐतिहासिक उपलब्धि जोडेका छन् । पुरुष ५० मिटर फ्रिस्टाइलको एस–५ विधामा उनले प्रारम्भिक चरण पार गर्दै फाइनलमा आफ्नो स्थान पक्का गरेका हुन् ।
एसियन पारा खेलकुदजस्तो ठूलो प्रतियोगिताको फाइनलमा पुग्ने उनी नेपालका पहिलो पारा पौडी खेलाडी बनेका छन् । यसअघि यो स्तरसम्म कुनै पनि नेपाली पारा पौडी खेलाडी पुग्न सकेका थिएनन् ।
राष्ट्रिय पारा पौडी संघ नेपालले हर्कमानको सफलतालाई ऐतिहासिक भन्दै उनको अनुशासन, साहस र निरन्तरको मेहनतले देशभरका पारा खेलाडीका लागि प्रेरणाको काम गरेको जनाएको छ । संघले उनका प्रशिक्षक, परिवार तथा सफलतामा योगदान गर्ने सबै पक्षलाई धन्यवाद दिँदै फाइनलमा पनि उत्कृष्ट प्रदर्शनका लागि शुभकामना व्यक्त गरेको छ ।
