२ कात्तिक, काठमाडौं । विमानमा बम राखिएको धम्की आएपछि इजरायलबाट अस्ट्रियातर्फ उडिरहेको अस्ट्रियन एयरलाइन्सको विमान बुल्गेरियामा आकस्मिक रूपमा अवतरण गरिएको छ ।
आइतबार राति तेल अभिभस्थित बेन गुरियन विमानस्थलबाट भियनातर्फ प्रस्थान गरेको एयरबस ए३२० विमानलाई बुल्गेरियाको राजधानी सोफियास्थित भासिल लेभ्स्की विमानस्थलमा अवतरण गराइएको बुल्गेरियाको यातायात मन्त्रालयले जनाएको छ । अवतरणपछि यात्रुहरूलाई विमानबाट बाहिर निकालिएको थियो ।
मन्त्रालयका अनुसार धम्कीको सूचना पाइएपछि विमानको सुरक्षाका लागि बुल्गेरियाली वायुसेनाले मिग–२९ लडाकु विमान परिचालन गरेको थियो । घटनामा कोही पनि घाइते भएको खबर छैन र अनुसन्धान थालिएको छ ।
बुल्गेरिया र इजरायलका सञ्चारमाध्यमका अनुसार विमानमा बम राखिएको धम्की आएको थियो, जसलाई अस्ट्रियन एयरलाइन्सले पनि पुष्टि गरेको छ । यद्यपि धम्कीको विस्तृत विवरण भने सार्वजनिक गरिएको छैन ।
एयरलाइन्सका प्रवक्ताका अनुसार विमानमा ५१ जना यात्रु र छ जना चालक दलका सदस्य थिए । धम्कीको सूचना आएको करिब आधा घण्टापछि विमान सोफियामा अवतरण गरेको थियो, र मार्ग परिवर्तन गर्दा विमान रोमानियाको आकाशमा उडिरहेको थियो ।
गत महिना तेल अभिभतर्फ जाँदै गरेको फ्लाइदुबईको विमान अपहरण गर्ने प्रयास भएपछि साउदी अरेबियामा सुरक्षित अवतरण गराइएको थियो । गत साता ग्रीसको कोर्फुबाट जर्मनीको न्युरेम्बर्गतर्फ जाँदै गरेको उडानबाट गल्तीवश अपहरणसम्बन्धी आपत्कालीन सङ्केत जारी भएपछि क्रोएसिया र जर्मनीले पनि लडाकु विमान उडाएका थिए ।
