काठमाडौं — पशुपन्छीको हित र संरक्षणलाई कानुनी रूपमा अझ बलियो बनाउन सरकारले छुट्टै पशु कल्याण विधेयक ल्याउने तयारी गरेको छ। कृषि, वन तथा पर्यावरणमन्त्री गीता चौधरीले विधेयकको मस्यौदा तयार भइसकेको र सरोकारवालासँग सुझाव संकलन भइरहेको जानकारी दिइन्।
आइतबार कुकुर तिहारका अवसरमा आयोजित कार्यक्रममा मन्त्री चौधरीले पशुपन्छीमाथि हुने क्रूरता रोक्न नीतिगत तथा कानुनी व्यवस्था अघि बढाइएको बताइन्। उनका अनुसार २०७८ सालमा मन्त्रिपरिषद्बाट सैद्धान्तिक स्वीकृति पाएपछि मस्यौदा तयार गरी अघि बढाइएको हो। पशु अधिकार र कल्याणका क्षेत्रमा छुट्टै कानुनको माग लामो समयदेखि उठ्दै आएको उनको भनाइ थियो।
नेपालको संविधानले नै पशु कल्याणसम्बन्धी व्यवस्था गरेको मन्त्री चौधरीले स्मरण गराइन्। मुलुकी अपराध संहिता, २०७४ ले पशुपन्छीको संरक्षण, लापरबाहीपूर्वक पालन, बेवारिसे रूपमा छोड्ने तथा निर्दयी व्यवहार नियन्त्रण गर्ने प्रावधान राखेको र क्रूरतामा दण्ड–सजायको व्यवस्था गरेको उनले बताइन्।
पशु कल्याण निर्देशिका, २०७३ ले ढुवानीका क्रममा हुने क्रूरता निषेध गर्नुका साथै कामदार पशुलाई दैनिक बढीमा आठ घण्टा मात्र काममा लगाउन पाउने र सातामा कम्तीमा एक दिन विश्राम दिनुपर्ने व्यवस्था गरेको छ। सरकारले स्थापना गरेको राष्ट्रिय पशु कल्याण तथा स्रोत व्यवस्थापन कार्यालयले पशु कल्याणसम्बन्धी गतिविधि व्यवस्थित गर्दै आवश्यक प्राविधिक मार्गनिर्देशन प्रकाशन गर्दै आएको छ।
कानुनी संरचना निर्माणसँगै विद्यमान व्यवस्थाको प्रभावकारी कार्यान्वयन आवश्यक रहेको मन्त्री चौधरीले बताइन्। पशुपन्छीमाथि हुने दुर्व्यवहार र क्रूरता अन्त्य गर्न सरकार प्रतिबद्ध रहेको उनको भनाइ थियो। उनले १९८४ सालमा तत्कालीन प्रधानमन्त्री जुद्धशमशेरले पशुपतिनाथ गौशाला स्थापना गरेको प्रसंग उल्लेख गर्दै नेपालमा पशु संरक्षणको अभ्यास पुरानो समयदेखि नै रहेको बताइन्।
