नितेश तिवारीले निर्देशन गरेको बहुप्रतिक्षित फिल्म ‘रामायण’ बिहीबारदेखि हलमा प्रदर्शनमा आएको छ। प्रदर्शनको पहिलो दिनमै फिल्मले बक्स अफिसमा उत्साहजनक सुरुवात गरेको छ।
भारतभर फिल्मका कुल १३ हजार ८ सय ९९ शो चलेका छन्। दिउँसो ३ बजेसम्मको तथ्याङ्कअनुसार फिल्मले भारतमा २८ दशमलव ८२ करोड रुपैयाँ नेट कमाई गरिसकेको थियो। यससँगै फिल्मको कुल ग्रस कमाई ३४ दशमलव ०१ करोड रुपैयाँ पुगेको छ।
भाषागत हिसाबले हिन्दी संस्करण सबैभन्दा अगाडि छ। हिन्दीमा ११ हजार ४ सय ८५ शोमार्फत २० दशमलव ९५ करोड रुपैयाँ सङ्कलन भएको छ। कन्नड संस्करणले ७ सय १ शोमाफर्त ३ दशमलव ४५ करोड, तेलुगुले ९ सय ४२ शोमाफर्त २ दशमलव ८३ करोड, तमिलले ४ सय ९० शोमाफर्त १ दशमलव ०५ करोड र मलयालमले २ सय ८१ शोमाफर्त ५४ लाख रुपैयाँ कमाएको छ।
पहिलो दिनको अन्तिम र पूर्ण तथ्याङ्क भने आउन बाँकी छ। बक्स अफिसमा फिल्मले रजनीकान्त अभिनित ‘जेलर २’ सँग प्रतिस्पर्धा गरिरहेको छ, जसले विश्वव्यापी रूपमा ८ सय करोडको आँकडा पार गरिसकेको छ। आयुष्मान खुराना र सारा अली खान अभिनित ‘उडता तीर’ पनि हलमा चलिरहेको छ।
‘प्राइम फोकस स्टुडियो’ र यशको ‘मोन्स्टर माइन्ड क्रिएशन्स’ को ब्यानरमा बनेको यस फिल्ममा रणवीर कपूर, यश र साई पल्लवी मुख्य भूमिकामा छन्। सनी देओल, रवि दुबे, अनुपम खेर, काजल अग्रवाल, रकुल प्रीत सिंह र विवेक ओबेरॉय पनि फिल्ममा देखिएका छन्।
