नेपाल प्रिमियर लिग (एनपीएल) को आगामी संस्करणका लागि पोखरा एभेन्जर्सले बंगलादेशका अलराउन्डर मोहम्मद सैफुद्दिनलाई टोलीमा भित्र्याएको छ।
सैफुद्दिन पोखराले भित्र्याएको तेस्रो बंगलादेशी खेलाडी हुन् भने समग्रमा पाँचौं विदेशी खेलाडी हुन्। यसअघि टोलीले बंगलादेशकै शाकिब अल हसन र महेदी हसनका साथै श्रीलंकाका धनन्जय लक्षण र चामिका करुणारत्नेलाई अनुबन्ध गरिसकेको थियो।
तीव्र गतिका बलिङ गर्ने अलराउन्डर सैफुद्दिन टोलीमा आएसँगै पोखराको तल्लो क्रमको ब्याटिङ र पेस बलिङ आक्रमण थप बलियो हुने विश्वास गरिएको छ। टोली व्यवस्थापनका अनुसार नेपाली तीव्रगतिका बलर आकाश चन्दसँगै सैफुद्दिन र चामिका करुणारत्नेले एनपीएलको खेलमा पेस विभागको जिम्मेवारी सम्हाल्नेछन्।
२९ वर्षीय सैफुद्दिनले बंगलादेशका तर्फबाट ३० एकदिवसीय र ५१ टी–२० अन्तर्राष्ट्रिय खेल खेलिसकेका छन्। एकदिवसीयमा उनको नाममा ४२ विकेट छ भने टी–२० अन्तर्राष्ट्रियमा ५७ विकेट। सबै प्रकारका टी–२० क्रिकेटमा उनले हालसम्म १५२ खेल खेल्दै १९३ विकेट लिएका छन्।
सैफुद्दिनले बंगलादेशको यू–१९ टोली र राष्ट्रिय टोलीका लागि खेल्नुका साथै देशभित्रका पाँच फरक फ्रेन्चाइज टोलीबाट घरेलु लिग पनि खेलेका छन्।
यस संस्करणका लागि पोखराले श्रीलंकाका पूर्वस्पिनर अजन्था मेन्डिसलाई मुख्य प्रशिक्षकको जिम्मेवारी दिएको छ भने भारतीय पूर्वक्रिकेटर तथा टी–२० विश्वकप विजेता इरफान पठानलाई क्रिकेट एम्बेसडरको भूमिकामा राखेको छ।
विदेशी खेलाडीमध्ये पोखराले श्रीलंकाका धनन्जय लक्षणलाई मात्र निरन्तरता दिएको छ; बाँकी चार विदेशी खेलाडी पहिलोपटक एनपीएल खेल्नेछन्। टोलीले मार्की खेलाडी कुशल भुर्तेलसहित सागर ढकाल, अर्जुन कुमाल, विपिन खत्री, आकाश चन्द, किरण ठगुन्ना र दिनेश खरेललाई पनि कायम राखेको छ। अक्सनबाट अर्जुन घर्ती मगर, विवेक रानामगर, सुदीप अर्याल, सन्नी बीके, विपिन आचार्य र प्रतीक पोखरेललाई भित्र्याइएको छ। स्थानीय प्रतिभा, राष्ट्रिय टोलीका अनुभवी खेलाडी र अन्तर्राष्ट्रिय अनुभव बोकेका विदेशी खेलाडीको संयोजनमा पोखराको लक्ष्य एनपीएलको पहिलो उपाधि उचाल्नु रहेको छ।
