फारसको खाडीमा इरानले बिहीबार तेल बोकेका चारवटा जहाजमाथि आक्रमण गरेको छ। इरानको इस्लामिक रिभोलुसनरी गार्ड कर्प्सले आफूले मान्यता नदिएका मार्ग प्रयोग गरी जहाजबाट जहाजमा तेल ओसारपसार गरिरहेका बेला ती जहाजलाई निशाना बनाइएको जनाएको छ।
हर्मुजको जलसन्धिमा इरानी नियन्त्रण र सम्भावित आक्रमण छल्न पछिल्लो समय व्यापारिक जहाजले खाडीकै बीचमा कार्गो साट्ने तरिका बढाएका थिए। गार्ड कर्प्सको जलसेनाले विज्ञप्ति जारी गर्दै भनेको छ, ‘उल्लङ्घनकारी भनिएका चारवटा जहाजलाई निगरानीमा राखेर पछ्याइएको थियो। खाडीको उत्तर-मध्य भागमा चारैवटा जहाजमाथि एकैसाथ आक्रमण भयो र अहिले ती जलिरहेका छन्।’
अर्कोतर्फ अस्वीकार गरिएका मार्ग छिचोल्न खोज्ने थप तीन जहाज हर्मुजको पश्चिममा बिछ्याइएका माइन्समा ठोक्किएपछि आगलागी भएर रोकिएका छन्।
गार्ड कर्प्सले गैरकानुनी ढंगले बिछ्याइएका माइन्स भएको मार्गमा जहाज पठाउन अमेरिकाले प्रोत्साहन गरेकाले दिनहुँजसो समुद्री दुर्घटना बढिरहेको आरोप लगाएको छ। यो प्रवृत्ति नरोकिए टकराव यो भिडन्त क्षेत्रमा रहेका ‘आक्रमणकारीका अड्डा’ सम्म फैलिने चेतावनी समेत उसले दिएको छ।
