नेपाल प्रिमियर लिगमा कर्णाली याक्ससँग छ विकेटले पराजित भएपछि विराटनगर किङ्सका कप्तान सन्दीप लामिछानेले कमजोर फिल्डिङ र बलिङकै कारण टोलीले जित गुमाएको बताएका छन्। बिहीबार लगातार दोस्रो हार व्यहोरेपछि खेलपछिको पत्रकार सम्मेलनमा उनले राम्रो सुरुवात र बलियो योगफल बनाए पनि आफ्नै गल्तीले नतिजा गुमेको बताए।
सन्दीपका अनुसार टोलीले चार–पाँच महत्त्वपूर्ण क्याच छाडेको थियो। खेलको पहिलो आठ–नौ ओभरसम्म विराटनगर बलियो अवस्थामा थियो, तर त्यसपछि विपक्षी ब्याटरलाई रोक्न नसक्दा खेल नियन्त्रणबाहिर गएको उनको भनाइ छ। दोस्रो इनिङ्समा परेको शीतले बलरलाई बल समात्न गाह्रो भएको र पिच ब्याटिङका लागि सहज बन्दै गएको उनले बताए। फिल्डरबाट अपेक्षित सहयोग नपाउँदा हार व्यहोर्नुपरेको उनको भनाइ छ।
सन्दीपले कर्णालीका कप्तान सोमपाल कामीको प्रदर्शनको प्रशंसा गरे। पाँचौँ नम्बरमा ब्याटिङ गर्न आएका सोमपालले दबाबका बीच उत्कृष्ट इनिङ्स खेलेको र ब्याटिङ तथा बलिङ दुवैमा राम्रो गरेको उनले बताए। सोमपालले अन्तिमसम्म क्रिजमा टिकेर पवन सर्राफ र गुल्सन झासँग मिलेर टोलीलाई जित दिलाएको सन्दीपको भनाइ छ।
विराटनगरका ब्याटर लोकेश बमको प्रशंसा गर्दै सन्दीपले उनकै ब्याटिङका कारण टोलीले एक सय ८७ रन बनाएको बताए। टोलीले एक सय ६० देखि एक सय ७० रनको लक्ष्य राखेको थियो। स्पिनरसमेत रहेका सन्दीपले अन्तिम ओभरमा आफैँ बलिङ गर्ने निर्णयबारे पनि प्रस्ट पारे। दोस्रो इनिङ्समा स्पिन बलिङ गर्न कठिन भए पनि जिताउन सकिने विश्वासका साथ बलिङ गरेको उनले बताए।
