तनहुँको व्यास नगरपालिकामा वडास्तरीय फुटबल प्रतियोगिता आयोजना हुने भएको छ। नगर खेलकुद विकास समितिको आयोजनामा दमौलीमा हुने प्रतियोगिता शुक्रबारदेखि सुरु हुनेछ। नगरपालिकाका १४ वटै वडाका टोलीले यसमा भाग लिनेछन्। प्रतियोगिताका सबै खेल व्यास नगरपालिका-३ मा रहेको बिपी वनवाटिकाको खेलमैदानमा हुनेछन्। यसका लागि आवश्यक तयारी पूरा भएको आयोजकले पत्रकार सम्मेलनमार्फत जानकारी दिएको छ।
प्रतियोगितामा एउटा वडाको टोलीमा सोही वडाभित्रका खेलाडी मात्र सहभागी हुन पाउने व्यवस्था गरिएको छ। स्थानीय स्तरमा लुकेका खेल प्रतिभा पत्ता लगाउनु, फुटबलको विकास गर्नु र वडा तहमा खेलप्रतिको चासो बढाउनु प्रतियोगिताको उद्देश्य रहेको आयोजकले जनाएको छ। प्रतियोगितामा पहिलो हुने टोलीले एक लाख रुपैयाँ, दोस्रो हुने टोलीले ७५ हजार रुपैयाँ र तेस्रो हुने टोलीले ५० हजार रुपैयाँ नगद पुरस्कार पाउनेछन्। उत्कृष्ट खेलाडी, सर्वाधिक गोल गर्ने खेलाडी र उत्कृष्ट गोलरक्षकलाई छुट्टै पुरस्कार दिइनेछ।
नगर खेलकुद विकास समितिका अध्यक्ष जीवन गुरुङले व्यवस्थित खेलमैदान नहुँदा लामो समयदेखि दमौलीमा एघार खेलाडीको फुटबल खेल्न सम्भव नभएको बताए। बिपी वनवाटिकाको मैदान व्यवस्थित हुँदै गएकाले १५ वर्षपछि यस्तो प्रतियोगिता आयोजना गर्न लागिएको उनको भनाइ छ। नगरप्रमुख वैकुण्ठ न्यौपानेले खेलकुदलाई नगरपालिकाले प्राथमिकतामा राखेको र वडा तहमा पनि खेल पूर्वाधार निर्माण भइरहेको बताए। सङ्घीय सरकारको सहयोगमा दमौलीको खेलमैदान स्तरोन्नतिको काम अघि बढाइएको पनि उनले जानकारी दिए। आयोजकले प्रतियोगिताले स्थानीय खेलाडीलाई प्रतिभा देखाउने अवसर दिने र दमौलीमा फुटबल गतिविधि विस्तारमा सहयोग पुग्ने अपेक्षा गरेको छ।
