काठमाडौं । फ्रान्समा विद्यालयको अवस्था सुधार र बढ्दो महँगी नियन्त्रणको माग गर्दै शनिबार भएको प्रदर्शनमा व्यापक हिंसा भड्किएको छ। देशभर करिब साढे पाँच लाख मानिस सडकमा उत्रिएको प्रदर्शनका क्रममा कम्तीमा एक हजार दुई सय जनालाई पक्राउ गरिएको सरकारले जनाएको छ।
पेरिस, लियोन र लिमोजसहित कैयौँ सहरमा प्रहरी र प्रदर्शनकारीबीच झडप हुँदा आगजनी, लुटपाट र तोडफोडका घटना भएका छन्। पेरिसमा प्रहरीले भीडलाई छरपष्ट पार्न अश्रुग्यास र पानीको फोहरा प्रयोग गरेको थियो भने लिमोजको टाउन हलमा लागेको आगोले भवनको छानोको एक भाग नै भत्कियो। लियोनको पर्यटन कार्यालयमा पनि आगजनी भएको छ।
प्रधानमन्त्री सेबास्टियन लेकोर्नुले हिंसाका क्रममा एक सय पचास प्रहरी घाइते भएको बताए। प्रदर्शनको पृष्ठभूमिमा देशका सयौँ माध्यमिक विद्यालयमा कर्मचारी अभाव र जीर्ण भवनविरुद्ध हप्तौँदेखि चलिरहेको विद्यार्थी आन्दोलन छ, जसमा अहिले ट्रेड युनियन र पुरानो ‘येलो भेस्ट’ समूह पनि सामेल भएका छन्।
राष्ट्रपति इमानुएल म्याक्रोंले तोडफोडमा संलग्नमाथि मुद्दा चलाइने चेतावनी दिएका छन्। शिक्षामन्त्री एडुआर्ड जेफ्रेले तीन हजार अस्थायी शिक्षक नियुक्त गर्ने घोषणा गरेका छन्, तर प्रदर्शन रोकिएको छैन।
