काठमाडौं । भारतको राजधानी नयाँ दिल्लीमा शुक्रबार भएको सरकारविरोधी प्रदर्शनपछि प्रहरीले कम्तीमा तीनवटा मुद्दा दर्ता गरेको छ। प्रदर्शनकारीविरुद्ध कनट प्लेस र मण्डी हाउस प्रहरी कार्यालयमा भारतीय न्याय संहिताको धारा २२३ लगायतका आरोपमा मुद्दा दर्ता गरिएको जनाइएको छ।
झडपका भिडियो, अपमानजनक टिप्पणी र भ्रामक सामग्री फैलाएको आरोपमा प्रहरीले १७ वटा सामाजिक सञ्जाल एकाउन्टमाथि पनि छानबिन सुरु गरेको छ। एकाउन्ट सञ्चालकहरूको परिचय, दर्ता विवरण र आईपी लगका लागि प्रहरीले एक्स कम्पनीलाई पत्राचार गरेको बताइएको छ।
शुक्रबारको ‘लहरा दो तिरंगा’ प्रदर्शनपछि पक्राउ परेका कक्रोच जनता पार्टीका संस्थापक अभिजीत दिप्के र अखिल भारतीय विद्यार्थी सङ्घका अध्यक्ष नेहा बोरा शनिबार रिहा भएका छन्। उनीहरूसहित आम आदमी पार्टीका केही नेताविरुद्ध पनि मुद्दा चलाइएको छ।
प्रदर्शनकारीहरूले मतदाता सूचीमा भएको अनियमितताको आरोप लगाउँदै मुख्य निर्वाचन आयुक्त ज्ञानेश कुमारको राजीनामा माग गरिरहेका छन्।
