काठमाडौं । अमेरिकी विदेशमन्त्री मार्को रुबियो भारत र उज्बेकिस्तानको भ्रमणका लागि शनिबार प्रस्थान गरेका छन्। अक्टोबर २० मा नयाँ दिल्ली पुग्ने रुबियोले भारतका वरिष्ठ सरकारी अधिकारी र व्यापारिक नेताहरूसँग भेटवार्ता गर्नेछन्।
भेटवार्तामा ऊर्जा सहकार्य, व्यापार, लगानी, रक्षा र उदीयमान प्रविधि मुख्य विषय रहनेछन्। अमेरिका–भारत रणनीतिक साझेदारीलाई थप बलियो बनाउने र क्षेत्रीय तथा विश्वव्यापी घटनाक्रमबारे विचार आदानप्रदान गर्ने कार्यक्रम तय भएको अमेरिकी विदेश मन्त्रालयले जनाएको छ।
यो भ्रमण राष्ट्रपति डोनाल्ड ट्रम्प प्रशासनले रुसबाट इन्धन आयात गर्ने देशबाट अमेरिकामा भित्रिने वस्तुमा सम्भावित थप शुल्कबारे निर्णय लिन ६० दिनको समय लिएका बेला हुँदैछ। ठूला रुसी तेल तथा ग्यास आयातकर्ताका वस्तुमा शतप्रतिशतसम्म थप शुल्क लगाउन सक्ने प्रस्तावित कानुनको प्रभाव अध्ययन भइरहेको छ।
रुबियोले भारतलाई अमेरिकाको महत्त्वपूर्ण सहयोगी भनेका छन्। भारत जानुअघि उनले उज्बेकिस्तानमा हुने सी५+१ मन्त्रिस्तरीय बैठकमा भाग लिनेछन्।
