काठमाडौँ — बडादसैँअन्तर्गत महाअष्टमीको दिन आइतबार पनि आफ्नो घर फर्कने यात्रुको भीड उस्तै देखिएको छ। उपत्यकाका प्रमुख बसपार्कहरूमा यात्रुको लाम देखिँदा सार्वजनिक यातायातमा बिहानदेखि नै चाप बढेको छ।
काठमाडौँ उपत्यका ट्राफिक प्रहरी कार्यालयका अनुसार घटस्थापनादेखि आइतबारसम्ममा करिब ४ लाख ९६ हजार यात्रु उपत्यकाबाट बाहिरिएका छन्। कार्यालयका प्रवक्ता प्रहरी उपरीक्षक नरेशराज सुवेदीले अष्टमीको दिन बिहान उपत्यका बाहिरिने सवारीसाधनको चाप निकै बढी देखिएको बताए। दिउँसोपछि भने बाहिरिने गाडीको संख्या क्रमशः कम हुँदै गएको उनको भनाइ छ।
नयाँबसपार्कसँगै माछापोखरी, कलङ्की, बल्खु, कोटेश्वर र गौशालालगायत क्षेत्रमा यात्रुको उल्लेख्य चाप देखिएको थियो। लामो दूरीका बसहरू यात्रुले खचाखच भरिएका थिए।
उपत्यका छाड्नेहरूको संख्या बढ्दै जाँदा उपत्यकाभित्रका सडकमा भने सवारीको चाप घटेको ट्राफिक प्रहरीले जनाएको छ।
