नुवाकोट । बुढीगण्डकी हुँदै त्रिशूली नदीमा आएको बाढीले पक्की पुल बगाएपछि अलपत्र परेको ढुङ्गे–त्रिशूली आवतजावतले नयाँ मोड पाएको छ । नुवाकोटको ढुङ्गे र त्रिशूली बजार जोड्ने २६७.७ मिटर लामो झोलुङ्गे पुल जम्मा २८ दिनमै निर्माण सम्पन्न भएको हो ।
बाढीले पुरानो पुल बगाएपछि वारिपारि आवतजावतमा गम्भीर समस्या भोगिरहेका स्थानीयलाई यो पुल निर्माणले ठूलो राहत दिएको छ । नेपाल निर्माण व्यवसायी महासंघ र नुवाकोट निर्माण व्यवसायी संघको सक्रियतामा छोटो समयमै पुल निर्माण सम्पन्न गरिएको हो ।
पुल पूर्ण रूपमा तयार भइनसकेकाले तत्कालका लागि दुईपाङ्ग्रे सवारीसाधनको आवतजावतमा रोक लगाइएको छ । यद्यपि पैदलयात्रीका लागि पुल प्रयोग गर्न मिल्ने बताइएको छ । नयाँ पुल बनेसँगै दुवै क्षेत्रका स्थानीयको दैनिकी सहज हुने अपेक्षा गरिएको छ ।
