तनहुँमा जन्मिएका ७२ वर्षीय ब्रह्म वाग्ले अहिले बेल्जियममा सेवानिवृत्त जीवन बिताइरहेका छन्। तीन दशकअघि उनी केही वर्ष काम गरेर फर्किने सोचसहित त्यहाँ पुगेका थिए, तर त्यो छोटो बसाइँ नै उनको जीवनको लामो अध्याय बन्यो।
नेपालमा उनी विद्यालयका प्रधानाध्यापक थिए। पछि चितवनको बेलचोकमा करिब १५ लाख रुपैयाँ लगानी गरेर दाल प्रशोधन मिल खोलेका थिए, जसमा करिब २० जनाले काम पाएका थिए। भारतबाट सस्तो तयारी दाल भित्रिन थालेपछि चार वर्षमै मिल बन्द भयो र उनी ऋणको बोझमा परे।
सन् १९९३ मा बेल्जियम पुगेका ब्रह्मले सुरुमा खेतमा काम गरे। पछि एक स्थानीयको खेतीमा फिल्ड म्यानेजर भएर १० वर्ष काम गरे। नगरपालिकामा सहयोगी कर्मचारी भएपछि उनले करिब २५ लाख रुपैयाँ लगानीमा राति चल्ने पसल खोले, जुन बेलुका ६ बजेदेखि बिहान ६ बजेसम्म खुल्थ्यो।
बेल्जियम पुगेको १० वर्षपछि उनले छोराछोरीलाई पनि आफूसँगै लगे। सन् २००९ मा घर किनेका उनले सात वर्षअघि पसल बेचे। अहिले उनका तीनै सन्तानले उच्च शिक्षा पूरा गरिसकेका छन्। श्रीमतीसँगै पेन्सनमा जीवन चलिरहेको उनले बताएका छन्।
लेखन र घुमफिरमा रुचि राख्ने ब्रह्मले दुई वर्षअघि ‘उपहार’ नामक कविता संग्रह प्रकाशित गरेका थिए। बेल्जियममा सुविधा र सुरक्षा भए पनि आफ्नो देशको सम्झना कहिल्यै नमेटिने उनको भनाइ छ।
