माथिल्लो कर्णालीका हिमाली जिल्लामा भारी हिमपात भएको छ। हुम्ला, मुगु, जुम्ला, डोल्पा र कालीकोटका उच्च भूभागमा परेको हिउँले त्यहाँको जनजीवन प्रभावित बनाएको छ।
डोल्पाको शे फोक्सुण्डो, डोल्पो बुद्ध र छार्का ताङसोङ गाउँपालिकामा हिमपात भइरहेको छ। हुम्लाको नाम्खा, मुगुको मुगुम कार्मारोङ, जुम्लाको पातारासी, तातोपानी र कनकासुन्दरी गाउँपालिका तथा कालीकोटको तिलागुफा नगरपालिकामा पनि हिउँ परेको स्थानीयले बताएका छन्।
डोल्पाका प्रमुख जिल्ला अधिकारी जुनु हमाल ढकालका अनुसार तल्लो डोल्पामा वर्षा र माथिल्लो डोल्पामा हिमपात भइरहेको छ। कात्तिक १२ गतेदेखि माथिल्लो डोल्पामा पदयात्री जान रोक लगाइएको छ र त्यहाँ पुगिसकेकाहरूको अवस्था बुझ्ने काम भइरहेको छ।
विपद्को जोखिम आकलन गरी कमाण्ड पोस्टको बैठक बसेको छ। जिल्ला आपत्कालीन कार्य सञ्चालन केन्द्र, सुरक्षा निकाय, स्वास्थ्य, खानेपानी र पूर्वाधार विकास कार्यालयसँग समन्वय गरेर उद्धार तथा राहतका लागि तयारी गरिएको छ।
मुगुका प्रमुख जिल्ला अधिकारी पोषनराज भण्डारीका अनुसार शुक्रबार बेलुका ५ बजेदेखि मध्यम वर्षा निरन्तर भइरहेकाले पहिरोको खतरा छ। त्यसैले आज सवारी आवागमन रोक्न प्रहरी खटाइएको छ। मुगुमा टेलिफोन नेटवर्क र प्रहरी सञ्चार राम्रोसँग नलागेको उनले बताए।
हुम्लाका प्रमुख जिल्ला अधिकारी भोलानाथ गुरागाईका अनुसार हिमपातले नाम्खा गाउँपालिकाका हिल्सा, लिमी र लाप्चाका बाटो बन्द भएका छन्। वर्षा र हिमपातको तीन दिनमा जोखिम क्षेत्रका बासिन्दालाई सुरक्षित स्थानमा सारिएको छ। सुरक्षा निकाय, रेडक्रस, स्वास्थ्य, खानेपानी र स्थानीय तहलाई खोज तथा उद्धारका लागि तयारी अवस्थामा रहन भनिएको छ।
