क्यानडाको मिसिसागामा आइतबार आयोजित एक विशेष समारोहमा विभिन्न क्षेत्रमा उल्लेखनीय काम गरेका ११ जना व्यक्तित्वलाई ‘प्रोफेसनल अचिभमेन्ट अवार्ड क्यानडा २०२६’ प्रदान गरिएको छ। सिजन मिडिया प्रालि नेपालले आयोजना गरेको कार्यक्रम मिसिसागास्थित हक्का खजानामा सम्पन्न भएको हो।
पत्रकारिता, अध्यागमन कानुन, शिक्षा, उद्यमशीलता, वित्तीय व्यवस्थापन, रियल इस्टेट, संगीत, सञ्चार र सामुदायिक सेवामा योगदान पुर्याएका व्यक्तिहरूलाई सम्मान गरिएको आयोजकले जनाएको छ।
सम्मानित हुनेहरूमा खसोखास डटकमका प्रधान सम्पादक किशोर पन्थी, अमेरिकी अध्यागमन कानुन व्यवसायी बासु फुलारा, अनोखी लाइफ तथा द ओपन चेस्ट कन्फिडेन्स एकेडेमीकी संस्थापक राज गिर्न र इन्डो–क्यानडा चेम्बर अफ कमर्सका उपाध्यक्ष आलोक नागपाल छन्।
त्यसैगरी पिल रिजनल प्रहरी ब्राम्पटनकी सामुदायिक प्रतिनिधि गीता दवाडी ढकाल, क्यानडा नेपाल न्युज डटकमका प्रधान सम्पादक शिशिर सिम्खडा, वरिष्ठ संगीतकर्मी अमर शंकर सैंजु, गैरआवासीय नेपाली सङ्घ क्यानडाका सल्लाहकार चिरञ्जीवी घिमिरे, अध्यागमन कानुन व्यवसायी अतुल सुवेदी, मार्केटिङ प्राध्यापक तथा चार्टर्ड मार्केटर डा. तुलसी धरेल र रियल इस्टेट व्यवसायी मदन क्षेत्री (माइक) पनि सम्मानित भए।
सिजन मिडिया प्रालिका अध्यक्ष प्रदीप राज वन्तले सफल व्यक्तित्वको व्यावसायिक उपलब्धि र समाजप्रतिको योगदानलाई पहिचान गर्ने उद्देश्यले कार्यक्रम आयोजना गरिएको बताए। सम्मानित व्यक्तित्वहरूले आफ्ना व्यावसायिक यात्रा र अनुभवबारे धारणा राखेका थिए।
कार्यक्रममा नेपाली समुदायका प्रतिनिधि, व्यवसायी, सञ्चारकर्मी तथा विभिन्न सङ्घसंस्थाका प्रतिनिधि सहभागी थिए। आयोजकका अनुसार कार्यक्रम नेपाल र क्यानडाबिच व्यावसायिक, सामाजिक तथा सांस्कृतिक सम्बन्ध विस्तार गर्ने उद्देश्यले आयोजना गरिएको हो। कार्यक्रमको नारा ‘उत्कृष्टताको सम्मान, भविष्यको प्रेरणा र क्यानडा, नेपाल तथा एसियाबिच सम्बन्ध विस्तार’ रहेको थियो।
