काठमाडौँ — नेपाल रेल्वे बोर्डले रेल चालक (लोकोपाइलट) पदका लागि दरखास्त आह्वान गरेको छ। बोर्डको कार्यालयले सोमबार सूचना जारी गर्दै इच्छुक नेपाली नागरिकलाई आवेदन दिन आह्वान गरेको हो।
सूचनाअनुसार इच्छुक उम्मेदवारले आगामी मङ्सिर २१ गतेभित्र आफ्नो दरखास्त पेस गर्नुपर्नेछ। प्रकाशित मितिले ३५ दिनभित्र आवेदन बुझाउनुपर्ने नियम सूचनामा उल्लेख छ।
नेपालमा सञ्चालन हुने रेल सेवा नेपाली चालकबाटै चलाउने उद्देश्यले यो सूचना निकालिएको बोर्डले जनाएको छ। नेपाली रेल चालक सूचीकृत गरी सेवा सञ्चालन गर्न लागिएको सूचनामा उल्लेख गरिएको छ।
बोर्डले दक्ष, योग्य, इमानदार तथा जिम्मेवार रेल चालक आवश्यक परेको स्पष्ट पारेको छ। दरखास्त दिन चाहने उम्मेदवारले आवश्यक कागजातसहित नेपाल रेल्वे बोर्डको केन्द्रीय कार्यालयमा निवेदन बुझाउनुपर्नेछ।
आवेदनका साथमा नेपाली नागरिकताको प्रतिलिपि र शैक्षिक योग्यताको प्रमाणपत्र संलग्न गर्नुपर्नेछ। यसका साथै मान्यता प्राप्त संस्थाबाट जारी भएको रेल चालकको लाइसेन्सको प्रतिलिपि तथा अनुभव र तालिमको प्रमाणपत्र पनि पेस गर्नुपर्ने सूचनामा उल्लेख छ।
रेल सेवा सञ्चालनको तयारी अघि बढिरहेका बेला बोर्डले चालक सूचीकृत गर्ने प्रक्रिया थालेको हो। योग्य उम्मेदवार छनोट भएपछि उनीहरूलाई सेवामा खटाइनेछ। दरखास्त दिनुअघि सूचनामा तोकिएका सबै कागजात तयार राख्न बोर्डले आग्रह गरेको छ।
