काठमाडौँ — पृथ्वी राजमार्गको सीमलधारा खण्डमा शनिबार दिउँसो पहिरो खसेपछि सडक एकतर्फी मात्र सञ्चालनमा आएको छ। चितवनको इच्छाकामना गाउँपालिका–४ अन्तर्गत मुग्लिन बजारनजिकैको भागमा माथिबाट खसेको पहिरोले सडकको एकतर्फी भाग छोपेको हो।
पहिरो खसेलगत्तै सडक पूर्ण रूपमा बन्द नभए पनि एउटा लेन मात्र प्रयोग गर्नुपर्दा सवारी आवागमनमा कठिनाइ भएको छ। उक्त खण्ड हुँदै काठमाडौँ र पोखरातर्फ आउजाउ गर्ने सवारीसाधनहरू पालैपालो चलिरहेका छन्।
इलाका प्रहरी कार्यालय मुग्लिनका अनुसार सडक दुवैतर्फ खुलाउन पहिरो पन्छाउने काम सुरु भइसकेको छ। पहिरो हटाउन तीन वटा मेसिन प्रयोग भइरहेको प्रहरीले जनाएको छ।
पहिरोले सडक छोपेको भागमा यातायात सहज बनाउन प्रहरी र सडक विभागका कर्मचारी खटिएका छन्। काम सकिएपछि सडक दुईतर्फी सञ्चालनमा आउने प्रहरीको भनाइ छ।
यात्रुहरूलाई उक्त खण्ड पार गर्दा सावधानी अपनाउन र ट्राफिक प्रहरीको निर्देशन पालना गर्न आग्रह गरिएको छ।
